Мәжіліс депутаттары, Nur Otan партиясы фракциясы мүшелері Мұрат Теміржанов пен Нұрлан Әлімжанов Ақмола өңірін аралап, ондағы еңбек ұжымдарымен кездесті. Көкшетау қаласына ресми іссапармен барған депутат Мұрат Теміржанов өңірдегі ірі кәсіпорын «Қазақстан Агро Инновациялық корпорациясында» болды. Ол шара аясында «КАИК» негізінде ауылшаруашылық техникаларын құрастыру процесімен танысты.
Қазақстан – Беларусь бірлескен кәсіпорны – ауылшаруашылығы техникаларын, атап айтқанда, тіркемелер, жинақтағыштар, қосымшалар, жем-шөп жинау техникаларын, экскаваторлар, түрлі көлемдегі және модификациялы жүк тиегіштер өндірісіне мамандандырылған. Кәсіпорын сонымен қатар Беларусь пен Ресейде өндірілетін дайын өнімнің негізгі жеткізушісі саналады.
Кездесуде Мұрат Теміржанов депутаттардың өңірлерге іссапарының негізгі мақсатымен таныстырды. Содан соң халық қалаулысы партияның облыстық филиалында азаматтарды жеке мәселелері бойынша қабылдады. Депутатқа 3 азамат өтініш білдіріп, түрлі мәселелер бойынша көмекке жүгінді. Барлық сұрақтар бойынша заң нормалары шеңберінде түсініктеме берілді. Сұрақтардың басым бөлігі ауылшаруашылығын дамыту, субсидияның төленуі тұрғысында болды.
Мәжіліс депутаты Нұрлан Әлімжанов Шортанды ауданындағы Бараев атындағы астық шаруашылығы ғылыми-өндірістік институтының қызметкерлерімен кездесті. Ол астық өсірудің заманауи технологияларымен танысып, институт музейін аралады.
Музей 1979 жылы құрылған. Мұнда 260-тан астам тарихи құнды экспонаттар сақталған. Атап айтқанда, академик В.Кузьмин, А.Бараев, А.Зайцевтің ғылыми жұмыстары сақталып, фотобейнелері жинақталған.
Ұжыммен кездесуде Нұрлан Әлімжанов Мәжілістегі заң шығару қызметі туралы, елде жүргізіліп жатқан реформалар барысын баяндады. Ол 2020 жылдың 1 қаңтарынан бастап күшіне енген өзгерістер туралы, міндетті медициналық сақтандыруды енгізу, көпбалалы отбасыларға мемлекеттік жәрдемақыларды тағайындаудың жаңа форматы, АӘК тағайындау, ауыл шаруашылығы, агроөнеркәсіптік кешенді мемлекеттік қолдау шараларын түсіндірді.