8 маусымда Франция президенті Эммануэль Макронды жағынан тартып жіберген француз азаматы Дамиан Тарел 18 айға еркінен ажыратылды. Ол түрмеде төрт ай отырады, қалған жаза мерзімін шартты түрде өтейді.
Бұл оқиға 8 маусымда Француз президенті Эммануэль Макрон елдің оңтүстігіне барған кезде болған.
Әлеуметтік желілерде жарияланған видеода Макрон халықпен амандасып жатқан кезде, арасынан бір адам президентке жақындап, "Макрония жоғалсын!" деп айқайлап, жағынан салып жіберген.
Ол сот отырысы кезінде істеген ісіне өкінбейтінін айтқан. Сотталушы Макрон ел жағдайын төмендетіп жіберді деген. Дамиан Тарел үкіметке қарсы "сары жилеттерді" қолдайтынын білдірген.
Ал Макрон бұл оқиғаға онша мән бермегенін, сайлаушылармен кездесуді жалғастыра беретінін жеткізген. Осыған дейін ол "демократияда жеккөрушілік пен зорлық-зомбылыққа орын жоқ екенін" айтқан.
Еске салсақ, тұрғынның президент Макронның бетінен шапалақпен ұрған сәтінің видеосы жарияланған еді.
