Елімізде «самопал» арақ қана емес, қолдан жасалған темекінің саудасы да өрістеген. Қаржылық мониторинг агенттігі Қарағанды облысында контрабандалық темекі сату дерегінің жолын кесті. Темекі өнімдерінің контрабандасы мемлекетке елеулі зиян келтіретіні белгісі: акцизделетін тауарлардан салық жинау жүйесі зардап шегеді.
Контрабанда қоғамға да айтарлықтай шығын келтіреді: біріншіден, заңды шығарылған шылым да адам өмірі мен денсаулығына қауіпті, ал қайда және қалай жасалғаны беймәлім бұл өнімдердің қаупі одан да зор. Қаржылық мониторинг агенттігі жедел-іздестіру шаралары барысында Қарағанды қаласында шығу тегі белгісіз 670 мыңнан астам қорап темекі өнімін тәркіледі. Қара нарықта бұл тауар 350 миллион теңгеден астам табыс түсірер еді. Тергеу барысында Әзербайжан азаматы басқа тұлғалармен бірлесіп, Қарағанды облысының аумағында «Космос», «Беломорканал», «Тройка», «Столичные» маркалы темекіні акцизсіз заңсыз сатқаны анықталды. Заңға қайшы әрекет салдарынан мемлекетке 149 миллион теңге көлемінде залал келтірілді. Тергеу жалғасады. Өзге ақпарат тергеу мүддесіне орай жария етілмеді.Ерік ЕРДЕНОВ