8 көлік соқтығысты
«Жол мұраты – жету» деп қазақ тегін айтпаған. Алайда көлік тізгіндеген адамға қыстыгүні бір жерден екінші мекенге жету қиямет қайымға айналғандай. Арқаның бораны мен аязы, кейінгі кездегі жауын жол жабылуына әсер етуде. Осындайда «жолға жауаптылар қайда қарайды?» деген сұрақ туындайды. Қарағанды облысы Полиция департаменті баспасөз қызметінің хабарлауынша, өткен демалыста Қарағанды-Теміртау тасжолында ауа райының қолайсыздығына байланысты 8 көлік соқтығысқан. Зардап шеккендер жоқ, дегенмен автобустар көктайғақ пен қатты жел салдарынан жол шетіне аударылып қалған. «Оқиға салдарынан зардап шеккендер жоқ. Қарағанды-Теміртау автожолында сегіз көлік соғылды. Автобустар көктайғақ пен қатты жел салдарынан жол шетіне аударылып қалған. Абай қаласы мен Еркін кенті арасында бір жағдай тіркелді. Автобус жол шетіне шығып, содан кейін бір жағына құлаған. Барлық факт тіркелген. Олар бойынша тиісті сараптама тағайындалды, нәтижесі бойынша процессуалдық шешім қабылданады» делінген Қарағанды облысы Полиция департаменті баспасөз қызметінің хабарламасында.Ақылы жолда тағы шектеу
Әрине, ауа райы қолайсыздығына байланысты жол жабылады. Бірақ неге екені белгісіз, ақылы жолдарда да осы шектеу. Жолдарды ақылы ету мақсатында 2015 жылы «Республикалық маңызы бар жалпыға ортақ пайдаланылатын автомобиль жолын (жол учаскесін) ақылы негізде пайдалану туралы» заң қабылданған болатын. Кейін ақылы жолдан түсетін қаржы қайда жұмсалады деген сұраққа 2020 жылдың қыркүйек айында «QazAvtoJol ҰҚ» АҚ Ақылы автомобиль жолдары дирекциясы филиалының директоры Марат Сүлейменов: – Қаражат ақылы жолдарды ұстауға кетеді. Жол – жыл бойы демалыссыз жұмыс істейді. Ақылы жолдарға төленетін ақша қыста ақылы жолды тазартуға, қар жинайтын құрылымдарды орнатуға, қосымша қарауға және күзетуге жұмсалады. Көктемде су тасқынына байланысты жұмыстарға, су өткізгіштерді тазарту жұмыстарына жұмсалады. Жаз мезгілінде жол белгілерін қолдану, жол белгілерін ауыстыру, қоқыстарды жинау, демалыс орындарын тазарту және басқа жұмыстарға жұмсалады, – деген болатын «Instagram әлеуметтік желісіндегі @kazautozhol парақшасының тікелей эфирінде.Гагаринға бара алмай қалдық
Қарағандыдан 40 шақырым жерде Гагарин атындағы ауыл бар. Сол мекеннің тұрғыны Әлібек деген азамат Қарағандыдан әзер жеткенін айтты. – Қарағандыдан шыққаннан кейін Теміртауға соқтым. Ол жақтағы жұмысымды аяқтап, ауылға қайтуым керек болды. Сол күні жол жабылды. Бір күн бойы көлігімді қаңтарып, қаладағы қонақүйде жатуыма тура келді. Ол жол ақылы, неге жауын болса, жол жабылады, соған таңым бар. Миллиардтаған теңге қоржындарына түсіп жатыр емес пе? Ақылы болғаннан кейін құм ба, тұз ба сеуіп, көктайғақты еріту керек қой. Ал боранда мүлде жол жабылады. Өйткені қар тазалап жүрген техника аз. Арнайы жол тазалаушылар бар емес пе? – дейді Әлібек. Бұл сөзге басқа да жол жүргізушілер де қосыла кетті. Мысалы, индрайвермен такси қызметін атқарып жүрген Мадияр деген азамат Қарағандыдан астанаға дейін төрт адам алғанын, жол жабық болғаннан кейін артқа қайтқанын, сол күні жолаушылардың ақшасын қайтып бергенін, соның кесірінен шығынға батқанын айтады.P.S.
Ақылы автомобиль жолын салу – автомагистраль, көпір және туннельдердің құрылысы мен жөндеу жұмыстарын қаржыландырып, пайдаланудың сапасын жоғарылатуды қамтамасыз етудің тиімді тәсілі екені рас. Сонымен қатар ақылы жол еліміздің қазынасынан жолды күтіп ұстауға бөлінетін шығынды азайтады. Дегенмен ақша жинауды ғана білетіндердің, қыс боран мен көктайғақта жолды жабумен шектелетініне қалай ғана қынжылмайсың?!
Қарағанды облысы