Елімізде жол-көлік оқиғаларынан зардап шегіп, бейбіт күнде жер жастанғандардың қатары күн санап өсіп барады. Өкінішке қарай, қалтасының қалыңдығы, жоғарыдағы «көкесінің» күші мен беделінің арқасында жазадан сытылып кетіп жатқандардың қатары азаймай тұр. Ондай «мықтылар» Ақмола өңірінде де аз емес.
Бірге туған бауыры Талғаттан қас пен көздің арасында айырылған Көкшетау қаласының тұрғыны Эльмира Хасенова да осындай әділетсіздіктің куәсі болған. Інісін қағып кеткен 14 жастағы бозбаланың жазасыз қалып, қылмыстық істердің тоқтатылуы оны қатты ашындырған.
«Былтыр қазанда Көкшетау қаласының іргесіндегі Станционный кентіне таяу тұста үйленемін деген қызымен жолдың жиегінде келе жатқан інімді 14 жастағы бозбала қағып кетіп, ол қапыда ажал құшты. Бауырым дәл сол күндері үйленемін деп дайындалып жүрген. Сол күннің ертеңіне неке қиюы тиіс еді. Алайда неке қию уақыты белгіленген, тойы өтетін уақытта қара жердің қойнына тапсырылды. Бірақ бауырымды қағып өлтірген бала мен оның көкесінің еш жазасыз қалып отырғаны өзекті өртейді. Арада бірнеше ай өткенде бізге сотқа дейінгі қылмыстық тергеу амалдарының тоқтатылғаны туралы қаулы келді. Істі тергеу органдары кәдімгідей жауып тастады. Біз, әрине бұл қаулымен келіспей, Ақмола облыстық прокуратурасына, Нұр-Сұлтан қаласының прокуратурасына және Бас прокуратураға арыздандық. Бұл қаулыда көп жағдайлардың ескерілмей қалғанын байқадық. Сондай-ақ естуімізше, көлік айдаған баланың көкесі бұрынғы ІІМ қызметкері екен. Бала кәмелет жасына толмағандықтан, жазадан құтылып кеткен. Сондай-ақ оның машинаны «айдап кету» бабы бойынша да жазадан сытылып кеткенін түсіндік. Біз істің 349-баптың 3 тармағы бойынша қайта қаралуын талап еттік. Дәл бүгін қылмыстық істің қозғалғаны туралы хабар келді», – дейді Эльмира Хасенова.
Өңірде жол апатын тудырып, адам өлтіргендердің жазасыз қалғаны жалғыз бұл емес. Өткен жылдың қазанында Көкшетау қаласының бағдаршамы жоқ М.Әуезов және Ж.Тәшенов көшелерінің қиылысында Ақмола облысы Полиция департаменті бастығы орынбасарының жүргізушісі И.Нефедова деген азаматты қағып кетіп, еш жазасыз құтылып кеткен. Құрықтың ұзын болғаны соншалық, істен тіпті іздестіру кезінде табылған заттай дәлел – бейнежазба да «белгісіз себептермен» жоғалып кеткен.
«Менің анамды өткен жылдың 2 қазанында қағып өлтірді. Тергеу шаралары кезінде іс бойынша бейнежазба жоғалып, ал іс бойынша осыған дейін жәбірленушінің сөзін сөйлеп келген куәгерлер арада үш ай өткеннен кейін өткен тергеуде сөзінен тайқып шықты. Тергеуден кейін жүргізуші де өзінің көрсетімдерінен айнып кетті. Құқық қорғау органдарынан, оның ішінде Бас прокуратурадан да келетін сілтеме жауаптар негізгі мәселеден ауытқып кетеді. Жүргізуші адам өлтірсе де ешқандай жазаға тартылған жоқ. Тіпті, көлік жүргізу куәлігінен де айырылған жоқ. Ал Ақмола облысының прокуратурасы өз шешімдеріне негіздей де алмады. Бұл қарапайым адамдар өмірінің еш мәні болмағанын көрсете ме?», – дейді Н.Нефедованың қызы Алена.
Дәл осындай оқиға Ақмола облысының Жақсы ауданында да қайталанған. Аудан әкімі орынбасарының жүргізушісі жол үстінде зейнеткер адамды қағып кетіп, ол сол жерде көз жұмған. Ал шенеунік жүргізушісі де еш жазасыз қалғанға ұқсайды.
«Өткен жылдың 2 желтоқсанында Жақсы ауылында менің әкемді аудан әкімінің орынбасары Сейдахметоваға тиесілі қызметтік автокөлікті тізгіндеген оның жүргізушісі Базылов қағып кетіп, әкем сол жерде жан тапсырды. Оқиға жұмыс уақытынан тыс, яғни сағат 18.40-та болған. Арада екі ай өткенде маған Базыловқа қатысты сотқа дейінгі тергеудің тоқтатылғаны туралы Жақсы ауданы полиция бөлімі бастығы Ишамбеков пен аудан прокуроры Торсықбаевтың қолы қойылған қаулы келді. Тергеуші Абдуахитов маған мұны Қазақстан Тәуелсіздігінің 30 жылдығына орай жасалған рақымшылық деп түсіндірді Мен мұнымен келіспей, облыстық Полиция департаментінің бастығына, облыс прокурорына шағым тастадым. Бұған қоса, жақында өңірге келген Мәжіліс депутаты Екатерина Смышляеваға шағымданып, ол Бас прокуратураға депутаттық сауал жолдады. Қазір прокуратура істі қарап жатқанын, 15 күн ішінде жауап беретінін айтты», – дейді Жақсы ауданының тұрғыны Марат Клименко.
Жоғарыда аталған үш оқиғада да шен-шекпенділердің қатысы болған істер тоқтатылған. Ал облыстық полицияның ресми жауаптарында қылмыстық істердің заңға сәйкес тоқтатылғаны айтылған.
Полиция департаментінің түсіндіруінше, Жақсы ауылындағы жағдай бойынша, 2 желтоқсанда қаза болған Николай Клименконың ісі бойынша қозғалған 345-бап бойынша қылмыстық іс 8 желтоқсанда қабылданған «ҚР Тәуелсіздігінің 30 жылдығына орай рақымшылық туралы» заңға сәйкес тоқтатылған.
«Базылов жасаған қылмыстық іс аса ауыр емес санатқа жатқызылады. Қылмыстық іс жүргізу кодексінің 35-бабына сәйкес, жәбірленушінің істі тоқтату үшін келісімі қажет емес. Сондықтан осы жылдың 1 ақпанында қылмыстық істі тоқтатуға шешім қабылданды. Ал 3 ақпанда прокуратура қабылданған шешімді бекітті», – дейді облыстық Полиция департаментінен.
Дегенмен соңғы мәліметтер бойынша, Станционный кентінде болған жол апаты бойынша қылмыстық іс қайта қозғалса, ал Жақсы ауданындағы іс бойынша жәбірленуші прокуратураның ресми жауабын күтуде.
P.S.
Қалай десек те, шен-шекпенділер мен бай-бағландардың айы оңынан туып тұр. Осы орайда тиісті органдардың қара қылды қақ жарып, әділетті іс жүргізуге көшетін уақыты жеткен сияқты.
