Еліміздегі кейбір кеңсе тауарлары дүкендерінің сөресінен А4 форматты қағаз жоғалып кетті. Индустрия және инфрақұрылымдық даму министрлігі оның себебін анықтап жатыр. Жалпы, 2021 жылы қазақстандық кәсіпорындар осы қағаздың 600 мың қаптамасын шығарыпты.
Бұдан бөлек, өткен жылы ішкі нарықта пайдалану үшін Қазақстанға А4 форматындағы кеңсе қағазының 20,4 млн қаптамасы (жалпы салмағы 51 мың тонна) жеткізілді. Оның ішінде басым көпшілігі немесе 61%-ы (31,3 мың тоннасы) – Ресейден, 30%-ы (15,1 мың тоннасы) – Түркиядан, 8%-ы (4 мың тоннасы) Қытайдан тасылған.
2021 жылдың қорытындысында, А4 қаптамасының орташа көтерме бағасы 1,5 мың теңгені құрады. 2022 жылғы наурызға қарай бағалар орта есеппен бір мың теңгеге немесе 67%-ға өсті. Қазір ірі жеткізушілер кеңсе қағазының 1 қаптамасын 3 мың теңге көтерме бағамен саудалайды.
Министрліктің дерегінше, бұл қымбатшылыққа Батыс Еуропадан қағаз шикізатын ағартуға арналған реагенттерді жеткізудегі іркілістер ықпал етуде. Сондай-ақ Ресейде кеңсе қағазын өндіру көлемі құлдырады. Солтүстік көрші бүгінде қоңыр түсті қағаз шығаруға көшіп жатыр.
Қазақстанда кеңсеге арналған дайын қағазды кесу және ораумен айналысатын 2 зауыт жұмыс істейді. Өткен жылы осы кәсіпорындар 600 мың А4 қағаз бумасын өндірген, бұл ішкі нарықтағы барлық тұтыну көлемінің 5%-ын ғана құрайды.
«Негізі, Qagaz Ordasy ЖШС жылына 3 млн бума, ал Goida.kz 3,6 млн А4 кеңсе қағазын шығаратын өндірістік қуатқа ие. Кесуге және буып-түюге арналған қағаз орамдары түріндегі шикізаттың негізгі бөлігі Ресей мен Финляндияда өндіріледі. Алайда ресейлік зауыттар қазақстандық компанияларға қағаз орамдарын тікелей сатпай, оларды Қазақстандағы өз өкілдері – «Литан» ЖШС және «Резервснаб Плюс» арқылы ғана саудалайды. Сәйкесінше, сауда-саттықты шектеп отыр», – деп түсініктеме берді Индустрия министрлігі.
