Kaspi.kz-тің негізін қалаушы әрі басшысы Михаил Ломтадзе бесінші жыл қатарынан Қазақстандағы үздік компания басшысы болып танылды. PricewaterhouseCoopers (PwC) халықаралық компаниясы жүргізген СЕО Survey 2022 сауалнамасының нәтижесі осындай.
«Зерттеуді ұйымдастырғаны үшін PwC компаниясына және сауалнамаға қатысушылардың барлығына ризашылығымды білдіремін. Бұл – жатпай-тұрмай жаңа сервистерді тұрақты түрде іске қосып, өмірімізді жақсартатын бірегей инновациялармен біздің сүйікті клиенттерімізді әрдайым таңғалдыруға тырысатын бүкіл командамыздың марапаты.
Kaspi.kz сынды бірегей, кәсіби білікті әрі ынтымағы жарасқан команданың бір бөлшегі екенімді мақтан тұтамын. Бізбен бірге болғаны үшін әрбір сүйікті клиентімізге рақмет айтамыз. Біз әрдайым үміттеріңізді ақтаймыз», - деп пікір білдірді Михаил Ломтадзе.
Сауалнамаға экономиканың әртүрлі секторларынан қазақстандық ірі компаниялардағы 71 CEO қатысты. Респонденттер Kaspi.kz компаниясының жиі өзгеріп отыратын жағдайларға бейімделу деңгейінің жоғары екенін, жаңа, заманауи сервистерді жедел ендіретінін және тұтынушылардың тарапынан сенім білдіру деңгейінің жоғары екенін атап өтті.
PwC бұл зерттеуді бүкіл әлем бойынша 25 жыл бойы, ал Қазақстанда соңғы 10 жыл бойы жүргізіп келеді.
Сауалнаманың негізгі мақсаты – жаһандық және ұлттық экономикадағы жағдай туралы басшылардың пікірін бағалау, бизнесті дамытудағы тәуекел факторлары мен мүмкіндіктер туралы білу.
Зерттеудің толық нұсқасымен PwС сайтында танысуға болады.
