Сонымен қатар бұл істе Д.Қонаевтың еңбегіне баға берілген 50-ден астам мінездеме мен партиялық қорытынды қаулылар, Қазақстан Компартиясының Орталық Комитетінің пленумы отырыстарының хаттамаларының көшірмелері, өмірбаяндық құжаттары тігілген. Мұнда зерттеушілерді қызықтыратын ең басты құжат ол Дінмұхамед Ахмедұлының өз қолымен жазған өмірбаяндық жазбасын айтуға болады. Сондай-ақ мұнда Дінмұхамед Қонаевтың қызметтегі барлық қайраткерлік ғұмыры баяндалған және оның тікелей ұйымдастыруымен жүзеге асқан Қазақстанның өндірістік гиганттары мен сол уақытта бой көтерген 44 қаланың салынуы бейнеленген фото-құжаттардан құралған альбомы Архивтің кітапханасында бар.
Сонымен қатар Архивтің қызметкерлері 2002 жылы Д.Қонаевтың 90 жылдығына орай ашылған музейіне де жиі қатынап тұрады. Ұлы тұлғаның өмірімен, саяси еңбек жолымен, 3 мыңнан астам фото-құжаттарымен, қолданыста пайдаланған эскпонаттарымен және шежіре тарихымен, ол туралы қазақтың ғалымдарының және халықаралық саясаткерлердің берген бағаларымен музейдің жетекшісі Елена Ивановна Кубашева әрқашан толық таныстыру жасап, құнды мәліметтермен бөлісіп отырады.
Д.А.Қонаев – 45 жылдай басшылық қызметте еңбек етіп, 25 жыл Қазақстанды басқарған әрі 21 жыл Кеңестік Социалистік Коммунистік партия бюросының мүшесі болған. Оның музейінен 1939 жылы отау тіккеннен бастап өмір бойы қасында болған жан жары Зухра Шәріпқызының күнделікті ұстаған заттарымен, оның қол іздерімен танысып, олардың үлгі аларлық отбасылық қарым-қатынасына тәнті боласыз. Дінмұхамед Ахметұлының тұлғалық тұғыры мен танымын зерттеген сайын ол өзінің әлеміне жетелейді. «Ғасыр саңлағы» қатарына енген Димекеңе берген халықтың бағасының қаншалықты шынайылығына көз жеткізесіз.
Оның мемориалдық пәтерімен сол жердің таныстырушы маманы Тимур Талғатұлы таныстырып шықты. Ондағы Дінмұхамед Ахметұлының 5 мыңнан астам бай кітапханасы мен басқа да хоббилерінің жиынтықтары адамды бірден баурап алып кетеді. Халқы арқа сүйеген ардақты ердің дархандығы мен қазақи бауырмалдық әрекеттерінің тәрбиелік мәні тереңнен бастау алады. Димекең тек елдің еңсесін көтерумен, елдік шекараны анықтап, экономикалық-өндірістік саланы ұтымды жолдармен дамытқан білгір басшы болып тарихта қала береді. Оның бүгінгі тәуелсіз Қазақстанның іргетасын қалауға қосқан өлшеусіз үлесі, дербес қайраткерлігі халық жадында мәңгіге сақталып, ұрпақтан-ұрпаққа ұлықталып отыратын ұлы тұлға болып қала береді деп сенеміз.
Нұрлан ТОҚСАБАЕВ, Қазақстан Президенті Архивінің аға сарапшысы