Марат Бекетаевтың ұсталуына қатысты жаңа мәлімет пайда болды, – деп хабарлайды Aikyn.kz.
Сыбайлас жемқорлыққа қарсы қызмет өкілдері экс-әділет министрі Марат Бекетаевтың ісіне қатысты жаңа мәлімет берді.
Ресми мәліметтерге сәйкес, Әділет министрлігінің бұрынғы басшысына қатысты қызметтік өкілетін асыра пайдаланды (ҚР ҚК-ның 361-бабы, 4-бөлігі, 3-тармағы) бойынша соталды тергеу басталған.
"Бұл ретте М. Бекетаев ұзақ уақыт елден тыс жерде болды. 2023 жылғы қазанда М. Бекетаев Қазақстанға оралды. Бірақ көп ұзамай елден қайта кетуге әрекеттенді. Стамбул арқылы транзитпен Астана-Лондон бағытына рейске әуе билеттерін сатып алған", – делінген Антикордың Tengrinews.kz редакциясының сұрауына берген ресми жауапта.
Ресми мәлімет бойынша, Марат Бекетаевты Астана халықаралық әуежайында рейске тіркелу кезінде сыбайлас жемқорлыққа қарсы қызмет қызметкерлері ұстаған.
"22 қазанда Астананың мамандандырылған ауданаралық тергеу соты күдіктіге қатысты қамауға алу түріндегі бұлтартпау шарасын санкциялады. Өзге мәлімет ҚР Қылмыстық-процестік кодексінің 201-бабына сәйкес жарияланбайды",–- деп қосты Антикор.
Tengrinews.kz тілшісіне белгілі мәлімет бойынша, Марат Бекетаев Қазақстанға қамауға алынардан бірнеше күн бұрын келген.
"Конституцияның 77-бабы 3-тармағы 1-тармақшасына және Қылмыстық-процестік кодекстің 19-бабы 1-бөлігіне сәйкес қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін бәрі кінәсіз деп есептеледі", – делінген хабарламада.
Фото: egemen.kz