Бұл – тағдыр тәлкегімен Қазақстанға еріксіз қоныс аударған түрлі этнос өкілдерінің құтты қонысына айналған қасиетті қазақ жері мен қонақжай халқымызға терең тағзымының белгісі. Біз мереке қарсаңында Парламент Сенатының депутаты Геннадий Шиповскихпен сұхбаттасқан едік.
– 1 наурыз – Алғыс айту күні Сіз үшін қандай мереке?
– Көктемнің алғашқы күні, алғашқы мерекесі – мен үшін ерекше. Алғыс айту күнінің тарихына үңіліп қарайтын болсақ, барша қазақстандықтар үшін ерекше мәнді, мағыналы мереке деп ойлаймын. Сонау ХХ ғасырдың басында әртүрлі жағдаймен қаншама этнос өкілдері қазақ жеріне көшіп келді. Өз отандарынан айырылып, мәжбүрлі түрде жер аударылды. Сол уақыттарда тағдыр тәлкегіне ұшыраған қаншама адамдарды, отбасыларды қазақ халқы даладай дархан көңілмен бауырына басты. Қараша үй, қара шаңырағында мейірімге бөлеп, қамқорлығына алды. Соңғы түйір дәнін, жарты нанын бөліп берді. Жатсынбады, жатырқамады. Бүгін ортақ Отанымыз, бейбіт еліміз, бірлігі жарасқан халқымыз бар. Сондықтан да түрлі этнос өкілдері қазақ халқына өз ризалығын білдіруде.
Алғыс айту мейрамы – тек ризашылық күні ғана емес, тарихтан сыр шертетін тағылымды мереке. Қазақстандағы барлық этнос өкілінің өмірлік өз шежіресі бар. Ал оның әрбір тарауында қазақ халқының өлшеусіз рөлі бар екені сөзсіз.
– Сіз алдымен кімге алғыс айтар едіңіз?
– Алғысымды бірінші кезекте мені әлпештеген, биікке көтерген қазақ халқыма айтамын. Маған өмір сыйлаған әке-шешеме, өсіріп, тәрбиелеген ата-анама алғысымды айтамын. Отбасыма алғыс айтамын. Барлығы менің қолдаушыларым, қорғаушыларым, қамқорым. Барлығына ризамын, рақмет айтамын. Жалпы, Алғыс айту күні – қысқа ғана уақытта халықтың ерекше ықыласына бөленген тамаша мейрам. Көктемнің алғашқы күні мейірімнің, жақсылықтың, бейбітшіліктің, татулықтың, ырыс-берекенің нышаны ретінде дамуы керек деп ойлаймын.
Сонымен қатар алғыс айту бүгінгі күннің батырларына да арналады. Себебі қазіргі уақытта құтқарушыларымыз, шекара күзетіндегі, құқық қорғау органдарындағы және басқа да елімізге қызмет етіп жүрген қаншама батырларымыз бар. Бұл кісілерге де өз алғысымызды айтамыз.
– Мерекені отбасыңыз, балаларыңыз қалай қарсы алады?
– Отбасым үшін де ерекше мейрам. Жаймашуақ көктемнің бірінші күнімен жарыса жеткен мереке отбасымызға да шуағын төгіп, қуанышын ала келеді. Мерекені жылы ықыласпен қарсы аламыз. Біз тату-тәтті шаңырағымызда бір-бірімізге алғыс айтып, ризашылғымызды білдіреміз.
– «Армансыз адам – қанатсыз құс» дейді. Арманыңызға қанат бітіріп, қиялыңызды ұштаған, білімге баулып, тәлім берген ұстазыңызды еске алып, алғыс айтуыңызға болады...
– Әрине, ұстаз әрбір адамның өмірінде ойып тұрып үлкен орын алады. Менің алғашқы ұстазым – Дәметкен апай. Кейін білім көкжиегіне жетелеген Ырыскүл апай, Мира апай секілді ұстаздарым көп. Ұстаздарымның барлығына басымды иіп тұрып алғыс айтамын. Қазақта «Ұстазы жақсының –ұстанымы жақсы», «Ұстаздан шәкірт озар» деген қанатты сөз бар. Сондықтан білімге баулып, тәрбие берген ұстаздарымның арманын орындадым деп ойлаймын.
Бір-бірімізге алғыс айту, ризашылығымызды білдіру дегенді көбіне ескере бермейміз. Шындығында, бір-бірімізге бар болғанымыз үшін, береке-бірлігімізді, ырыс-ынтымағымызды сақтай білгеніміз үшін алғыс айтудың, ризашылығымызды білдірудің маңызы зор. Барша ағайындарыма, әріптестеріме, достарыма, мені қолдап жүрген әрбір азаматқа алғыс айтамын. Мейрамымыз құтты болсын!
– Рақмет! Мерекеңіз құтты болсын!
Сұхбаттасқан
Тілекгүл ЕСДӘУЛЕТ