Tesla-ның Бас директоры Илон Маскке байланысты тағы бір мазасыз оқиға туралы BBC News мақала жариялады. Бұл жолы мәселе оның астрономиялық жалақысы туралы болған. Британдық басылымға сүйенген Aikyn.kz әлемдегі ең бай адамның артынан ерген даурықпа сөздердің мәнін түсіндіреді.
Илон Маск америкалық корпоративтік тарихта болмаған ең үлкен бонус алмақшы. Фото Getty Images сайтынан алынды. Авторы: Justin Sullivan / Staff
Масктің негізгі активтері – Tesla электромобиль компаниясындағы 17%-дық үлесі мен SpaceX ғарыштық компаниядағы 44%-дық үлесі. Ол 2021 жылы 11 миллиард доллар салық төлеп, АҚШ-тағы ең ірі жеке салық төлеушіге айналған.
Bloomberg пен Forbes 2023 жылдың қарашасында Масктың байлығын 198-220 миллиард долларға бағалап, оны әлемдегі ең бай адам деп жариялаған.
Енді миллиардерге америкалық корпоративтік тарихта бұрын болмаған ең үлкен жалақы тағайындалмақшы. Оны тағайындайтын Tesla-ның директорлар кеңесі. Директорлар кеңесі Илон Маскпен 56 миллиард доллар болатын ең үлкен өтемақы келісімін жасамақшы. Электр көлігін (EV) жасайтын компания өз акционерлерінен Бас директордың 2018 жылы белгіленген рекордтық өтемақыны төлеуге дауыс беруді сұрайды.
Алайда бұл келісімді қаңтарда АҚШ судьясы қабылдамай, оны «қол жетпейтін, түсініксіз сома» деп атаған.
56 млрд доллар өтемақы бермесе «Tesla-ның штаб-пәтерін Делавэрден Техасқа көшіремін» деп қорқытқан Илон Маск. Фото Getty Images сайтынан алынды. Авторы: Dimitrios Kambouris/Staff
Бұл жаңалық Маск Tesla-ның бүкіл әлем бойынша зауыттарындағы жұмыс күшінің 10%-дан астамын қысқарту жоспарын жариялағаннан кейін 4 күннен кейін белгілі болды. Aikyn.kz бұл қысқарту туралы 16 сәуірде жазған. Мына сілтемеден оқуға болады.
Қызметкерлерге жіберген үндеуінде Маск қысқарту оның ең жек көретін шешімі екенін айтады, «бірақ компания даму үшін мұны істеу керек» дейді.
Енді америкалық бизнес аудитория оның жалақысын талқылай бастады. Ұсынылатын 56 млрд долларлық өтемақы жылдық жалақы да, бонуста емес.
2018 жылы Илон Маск пен компанияның арасында жасалған келісімшартқа сәйкес, егер Tesla-ның нарықтық құны 10 жыл ішінде 650 млрд долларға жетсе, онда Бас директорға 56 млрд доллар өтемақы беріледі деп жазылған. Ал Tesla-ның қазіргі нарықтық құны 500,36 миллиард долларға бағалануда.
«Акционерлер үшін әділетсіз келісім» деп мәлімдеген судья Кэтлин МакКормик. Фото en.wikipedia.org сайтынан алынды. Авторы: Eric Crossan
Өзінің шешімін түсіндірген Делавэр штатының судьясы Кэтлин МакКормик төлем туралы келісім акционерлер үшін әділетсіз деп мәлімдеген. Ол мәміле бойынша келіссөздер жүргізген Tesla-ның директорлар кеңесінің мүшелері «супер жұлдыз» Масктың үндеуіне елтіп, акционерлерді толық хабардар етпегенін анықтаған.
Сонымен бірге судья Кэтлин МакКормик бұл шешім қабылдаған кезде Tesla-ны директорлар кеңесі емес, Маск өзі басқарғанын дәлелдеген. Соттың пікірінше, өтемақы комитеті бонустық мәміленің шарттары бойынша Маскпен келіссөздер жүргізудің орнына, «оның кеңесші органы ретінде жұмыс істеген». Бұл шешім Маскты ашуландырып, тіпті Tesla-ның штаб-пәтерін «Делавэрден Техасқа көшіремін» деп қорқытқан.
Tesla дүйсенбіде (15 сәуірде) акционерлерден Маскқа рекордтық өтемақы туралы келісімді мақұлдап, 2018 жылғы жалақы пакетіне қайта қол қоюды сұраған.
Директорлар кеңесінің төрағасы Робин Денхолм нормативтік құжаттамаға енгізілген хатында былай деп жазады: «Tesla соңғы алты жылда бірде-бір жұмысы үшін Илонға ақы төленген жоқ. Бұл бізді және мұндай жағдайды «түбегейлі әділетсіздік» деп санайтын көптеген акционерлерді таңдандыруда».
Денхолм ханым сонымен қатар Директорлар кеңесінің сот шешімімен келіспейтінін айтқан. «Делавэр сотының шешімі корпоративтік құқықтың қалай жұмыс істейтініне қарама-қайшы келеді деп ойламаймыз», – дейді ол.
Масктың 2023 жылы Tesla-дан алған өтемақысы 0 долларды құраған, өйткені миллиардер компаниядан жалақы алмайды. Тек акцияларға опциондар арқылы өтемақы алады. «Егер заңды түрде мүмкін болса, біз 2018 жылғы түпнұсқа пакетті жаңа акционерлердің дауыс беруіне ұсынамыз», – дей Tesla өкілдері. Олар сот шешіміне шағымдануды да жоспарлап отыр.
Қайта дауыс беру 2022 жылдан бері электр көліктерінің ең аз сатқан компания үшін қиын кезеңге келді. Әлсіз сұраныс оның келесі аптада жарияланатын тоқсандық табысына да әсер етеді деп күтілуде.
Маск былтырғы қиындықтардан кейін өзінің беделін қалпына келтіруге күш салуда. Tesla қауіпсіздік мәселелеріне байланысты көліктерін қайтарып алуға мәжбүр болды, Маск өзінің X (Twitter) әлеуметтік желісіне байланысты бірнеше проблемаларды басынан кешірді. Бұл қиындықтардың барлығы оның әлемдегі ең бай адам атануына кедергі келтіре алмаған. Сәттілік саған, Илон!