Бүгін Business Insider технологиялық жаңалықтар платформасы Tesla өзінің Қытай нарығындағы үлесін сақтап қалу үшін үш бірдей танымал моделінің бағасын төмендеткенін жариялады. Бұл шешімнің артында қандай бәсекелестік ойындар жатқанын Aikyn.kz сайты технологиялық сайттағы материалға сүйеніп түсіндіреді.
«Өндірісті сұранысқа сәйкес ұстау үшін Tesla бағасы жиі өзгеруі керек», – дейді Илон Маск. Фото ixbt.com сайтынан алынды
«Өндірісті сұранысқа сәйкес ұстау үшін Tesla бағасы жиі өзгеруі керек», – деп компанияның бас директоры Илон Маск жексенбіде (21 сәуір) мәлімдеген. Қытайдағы нарықтағы үлесін сақтағысы келетін Tesla сатылымының төмендеуіне байланысты қытайлық бәсекелестерімен баға соғысын күшейтуде.
Электр көлігін жасаушы демалыс күндері бірнеше нарықта көліктерінің бағасын төмендетті. Қытайда Tesla өзінің Model 3, S, X және Y моделдерінің бағасын 1 930 долларға төмендеткен. Ал Y моделіне жеңілдік одан да көп: қазір ол 34 500 доллар тұрады, оның бағасы қаңтарда 41 403 доллар болған.
Қытайда Tesla-ның Model 3, S, X және Y моделдерінің бағалары 2000 доллардай төмендеді. Фото Getty Images сайтынан алынды. Авторы: Brandon Bell
Осыған ұқсас арзандату өткен жұмада (19 сәуірде) АҚШ-та болды, онда S, X және Y модельдерінің бағасы әрқайсысы 2000 долларға төмендетілді. АҚШ-та Tesla жаңа Cybertruck және Model 3 бағасы ғана өзгеріссіз қалған.
Tesla-ның әрекеті қытайлық автоөндірушілердің назарынан тыс қалмады, олар да дәл осылай жауап берді. Дүйсенбіде (22 сәуір) Li Auto өзінің барлық үлгілеріне 2 485 доллардан 4 144 долларға дейінгі бағаны төмендететінін жариялады.
Қытайлық BYD болса наурыз айында Yuan Plus көлігінің арзан нұсқасын шығарған кезде бағаны төмендеткен еді. Көлік 16 600 долларға сатылады және оның алдындағы бағадан шамамен 12% арзандаған.
Tesla-ның бас директоры Илон Маск: «Басқа автокөліктер дилердің үстеме бағасы мен өндіруші/дилердің ынталандыруларына байланысты бағаларды үнемі және жиі өзгертеді», – деп мәлімдеді.
Tesla қытайлық бәсекелестерімен «баға соғысына» дайындалуда. Фото chinadaily.com.cn сайтынан алынды
Бағаны төмендету толқыны өткен аптада бүкіл әлем бойынша жұмыс күшінің 10%-дан астамын қысқартқан Илон Масктің автокөлік компаниясы үшін қиын уақытта жарияланды. Маск қызметкерлерге арналған ішкі хабарламасында жұмыс орындарын қысқарту Tesla-ның «жаңашыл және келесі өсу фазасының циклін ашу» үшін қажет екенін айтқан болатын. Бұл туралы Aikyn.kz арнайы материалында жазды.
2 сәуірде Tesla осы жылдың бірінші тоқсанында 386 810 көлік сатқанын жариялады, бұл 2023 жылдың төртінші тоқсанымен салыстырғанда 20,1%-ға аз. Tesla-ның соңғы тоқсандағы нәтижелері де 2022 жылдан бергі ең нашар тоқсандық көрсеткіштер болды. Сатудың бәсеңдеуімен қатар, Tesla Қытайдағы жойқын бәсекелестікпен күресуге мәжбүр.
Қаңтар айында Илон Маск Tesla-ның қытайлық әріптестерінен төніп тұрған қауіпті мойындап, қытайлық автоөндірушілер «әлемдегі бәсекеге қабілетті автокөлік компаниялары» екенін айтқан. Шын мәнінде, Маск өзінің қытайлық бәсекелестерін барлық автоөндірушілер үшін экзистенциалды қауіп ретінде көрсетуде.
«Егер сауда кедергілері орнатылмаса, олар әлемдегі басқа автомобиль компанияларының көпшілігін жояды», – деп мәлімдеді Илон Маск қаңтардағы инвесторларға арналған қаржылық конференцияда.
Tesla электр көлігінің оң және теріс жақтары мына видеода:
АҚШ билігінің өз нарығына қытайлық технологиялық тауарлар мен қызметтерді таратуға тыйым салу күшейіп келеді.
Бүгінге дейін басқаларды «нарықта тауар айналымын экономикалық тиімділік анықтауы керек» деп үйретіп келген америкалық саяси биліктің көзқарасы өзінің ұлттық мүддесіне келгенде жылдам өзгерді.
Қытайлық арзан электромобильдері мен смартфондарын, 5G жабдықтарын, TikTok әлеуметтік желісін ұлттық қауіпсіздік үшін қауіпті деп жариялап, нарық заңдарына қайшы келсе де тыйым салуы өзінің ішкі нарығын қорғауда Ақ үйдің басқа амалы қалмағанын көрсетеді. Абай атамыз бұндай мінезді біліп суреттеген:
«Қалың елім, қазағым, қайран жұртым, Ұстарасыз аузыңа түсті-ау мұртың.
Жақсы менен жаманды айырмадың, Бірі қан, бірі май боп енді екі ұртың.
Бет бергенде шырайың сондай жақсы, Қайдан ғана бұзылды сартша сыртың?
Ұқпайсың өз сөзіңнен басқа сөзді, Аузымен орақ орған өңкей қыртың».
Бұл сөздерді қазаққа ғана емес, қазіргі халықаралық дағдарыстарды күшпен шешкісі келетін, бүгінге дейін өзінің көшбасшылық мәртебесін басқалардың есебінен күшейтіп келген ірі мемлекеттерге де арнауға болатын сияқты.