Ұйымдастырушылардың айтуынша, «Таза Қазақстан» экологиялық акциясы аясында өткен сенбіліктің мақсаты – қоғам назарын тазалық пен тәртіпке аударумен қатар, жастарға ұлттық мәдениет пен әдеби мұра туралы маңызды ақпарат беру. Далада аяз бет қаратпай тұрса да, сенбілікке жастар көп жиналды. Елорданың экологиялық ахуалын жақсарту, санитарлық тазалықты сақтау және тұрғындарға қолайлы орта қалыптастыру мақсатында қала әкімдігі «Таза Қазақстан» экобағдарламасы аясында түрлі сенбілік, апталық ұйымдастыруды әдетке айналдырған. Сондай-ақ «аузы дуалы» тұлғаларды шақырып, қоғамдық жұмыстардың мәнді-мағыналы болуын да ескереді. Мәселен, Қалыбек Қуанышбаев атындағы қазақ мемлекеттік академиялық музыкалық драма театры мен Мұхтар Әуезов ескерткішінің маңын тазалау жұмыстарына жазушы, халықаралық Алаш сыйлығының лауреаты Толымбек Әбдірайым және Қазақстан Жазушылар одағы Астана қаласы филиалының директоры Дәулеткерей Кәпұлы шақырылыпты.
Жазушы Толымбек Әбдірайым «Сенбілік дегеніміз – тазалық жұмыстары ғана емес, жастарға ұлттық мәдениет пен әдеби мұра туралы маңызды ақпарат жеткізетін танымдық іс-шара деңгейінде болғаны құптарлық шаруа», – деді.
– Әрі «Таза Қазақстан» деген сөз жай экологиялық ортаның тазалығы емес, ол жан дүниенің, тілдің, рухтың, сананың тазалығын дәріптеуге жол ашқаны дұрыс. Әркім тазалықты өзінен бастайды деп айтып жүрміз. Ендеше адамдар сол тазалықты тілінен, әдеп-иба мінезінен бастаса, онда нағыз «Таза Қазақстан» болар едік. Елімізді қоқыс пен қардан ғана емес, жемқорлық пен парақорлықтан, әділетсіздіктен де тазартсақ, сонда біздің басты миссиямыздың орындалғаны, – деді жазушы.
Сондай-ақ шара барысында студенттерге қазақ әдебиетінің классигі Мұхтар Әуезовтің өмірі мен шығармашылығы туралы келелі әңгіме айтылды. Қазақтың жазба әдебиетінің қалыптасуы жолында мол әрі бай мұра қалдырып, драматургия саласының дамуына ұшан-теңіз еңбегі сіңген заңғар жазушы туралы күнді түнге жалғап айтуға болады. 20 жасында М.Әуезов Шекспирдің Ромео мен Джульетта хикаясымен желілес өзінің тұңғыш көлемді туындысы «Еңлік-Кебекті» жазды. Қазақтың театр өнері сахнасынан ойып орын алған бұл пьеса күні бүгінге дейін көрерменін жалықтырған емес. Бір ғана «Абай жолы» роман-эпопеясы арқылы Абайдай ұлт мақтанышының атын дүниежүзіне әйгілеп таныстырумен қатар, қазақ халқын, оның ұлттық дәстүрі, салт-санасы мен мәдениетін, ғұмырлық құндылықтарын барлық қырынан энциклопедиялық деңгейде жан-жақты дәріптеді. Сондықтан, қарымды қаламгердің ұлт руханиятына сіңірген ұлан-ғайыр еңбегін өскелең ұрпаққа үнемі насихаттап-дәріптеудегі іс-шараның қандай форматта да «сөйлегенінен» ұтылмайтынымыз анық.
Мемлекет басшысы Қасым-Жомарт Тоқаев: «Экология – жарлықпен жасалатын, өкіммен орындалатын шаруа емес. Тазалық алдымен халқымыздың әдетіне, сосын қанға сіңген қасиетіне айналуы қажет. Шын мәнінде, өркениетті елдің басты сипатының бірі – тазалық пен тәртіп» деп атап көрсеткен болатын. Қазір республикамыздың барлық аймағында, түкпір-түкпірінде дерлік «Таза Қазақстан» экобағдарламасы жүзеге асып жатыр. Бес жылға дейін жалғасатын шараның ауқымы кең. Қоршаған ортаның ластануы өзекті болып отырған қазіргі қоғамда экологиялық мәдениетті қалыптастырумен қатар, азаматтардың қоршаған ортаға деген жауапкершілігін арттырудың маңызы зор. Осы бағытта балабақшадан бастап, яғни «еңбектеген жас, еңкейген кәріге» дейін «жұдырықтай жұмылуы» керек.
Акция басталғалы бері елорда әкімдігі «Таза Қазақстан. Астана – тазалық пен тәртіптің үлгісі» атты кең көлемді тазалық акциясын қолға алды. «Астана тазалық» ЖШС мамандарының айтуынша, экоакция шеңберінде шаһардың экоахуалын бақылау, нөсер және арық кәріз желілерін санитарлық тазалау, көшелерді, тротуарларды, орамішілік аумақтарды, қоғамдық кеңістіктер мен аулаларды тазалау, қыста қар шығару жұмыстарының ауқымын кеңейту, шараға қоғам назарын аудару секілді қыруар жұмыс атқарылып жатыр. Қаланың санитарлық-экологиялық тазалығын қамтамасыз ету барысында халықаралық тәжірибелер кеңінен қолданылады дейді мамандар. Сондай-ақ қала тазалығын үнемі қалыпты сақтау үшін күн сайын мыңдаған қызметкер мен техника жұмыла жұмыс істейді.
Мәселен, қазан айындағы ресми ақпаратқа сәйкес айтар болсақ, экоакциясы аясында жыл басынан бері Астананың бес ауданынан 162 мың тонна қоқыс жиналып, полигондарға шығарылған. Түрлі мониторингтік рейдтердің арқасында заңсыз полигондарды жою жұмыстары жалғасын тауып отыр. Соның ішінде, жаңа ошақтардың пайда болуына жол бермеу бойынша шаралар қабылданған. Жоба аясында «Tаза Астана» жаңа әлеуметтік жобасы да іске қосылыпты. Аталмыш жоба құқықтық тәртіп, абаттандыру, көгалдандыру, санитарлық тазалау, көппәтерлі тұрғын үйлердің, үй жанындағы, орамішілік және аула аумақтарының кірме топтарының тазалығы мәселелері бойынша жүйелі жұмыс жасауға бағытталған.
Ал қыс мезгілінде Астанадағы тазалық жұмыстары тіптен қарқынды жүргізілетіні белгілі. Әсіресе, қаланы қардан тазалау жұмыстары қарқынды жүреді. Күн сайын коммуналдық сала қызметкерлері жүздеген ауыр жүк көлігімен мыңдаған текше метр қар шығарады. Бұл жұмыс тәулік бойы ауысымдық режимде жүргізіледі. Ресми мәлімет бойынша, қыс басталғалы бері қаладан 75 703 рейспен 961 000 текше метр қар шығарылыпты. Коммуналдық қызмет өкілдерінің айтуынша, ережеге сәйкес, ең алдымен, қалада кептеліс болмас үшін өте қарқынды қозғалыс учаскелері тазаланады, одан кейін орташа қарқындылығы бар учаскелер-алаңдар, вокзал маңы аумақтары, тротуарлар, әлеуметтік нысандарға кірме жолдар қардан тазартылады.
Жыл он екі ай маусымдық жұмыстардың қарқыны төрт мезгілдің ауысу мерзіміне сай түрленіп отырады. Астана сияқты тез дамып келе жатқан алып мегаполистің тазалығы мен тәртібін қадағалау үшін тынымсыз еңбек пен ұқыпты ұйымдастыру жұмыстарының қажеттілігі әуел бастан өзекті, әрі маңызды. Сондықтан «Жұмыла көтерген жүк жеңіл» демекші «Таза Қазақстан. Астана – тазалық пен тәртіптің үлгісі» акциясы аясында астаналық еріктілер мен белсенді азаматтар және коммуналдық қызметкерлер бірлесе елордамыздың тазалығы мен абаттандырылуы жолында аянбай тер төгіп келе жатқанын айтуымыз керек. Жақында Астананың биіктігі 65 метрлік шолу дөңгелегінде «Еңбегіңізге мың алғыс!» жазуымен коммуналдық қызмет мамандарының фотосуреттерінің жариялануы адал еңбек пен қарапайым еңбек адамына деген ізгі ниеттен туған зор құрмет десек қателеспейміз.
Тілекгүл ЕСДӘУЛЕТ