Кезектен тыс Президент сайлауына «Ұлт тағдыры» қоғамдық бірлестігінің атынан ұсынылған кандидат Әміржан Қосанов өзінің сайлауалды тұғырнамасын жария етті. Ә.Қосановтың сайлауалды тұғырнамасы: «Саяси бостандықтар», «Ұлттық болмыс», «Сөз жүзіндегі емес, іс жүзіндегі тәуелсіздік», «Жемқорлыққа жол жоқ», «Өркениетті әрі халықшыл экономика», «Бақуатты аймақтар – бақуатты мемлекет» атты 6 бөлімнен тұрады.
Кандидат сайлауалды тұғырнамасында сайлауда жеңіске жеткен жағдайда, мемлекет өмірінде қандай өзгерістер болып, еліміздің қай бағытпен дамитыны туралы жоспарымен бөліскен.
Президенттікке үміткер Әміржан Қосанов сайлауалды штабымен Солтүстік Қазақстанды аралап жүр. Аталған облыстың Булаево қаласында Қазақстан Президенттігіне кандидат жергілікті тұрғындармен кездесті. Штаб өкілдері батыр Баян мен Мағжан Жұмабаевтың ескерткішіне барды. Тұрғындармен кездесуде кандидат өзінің сайлауалды тұғырнамасының бағыттарымен таныстырды, солтүстік өңір тұрғындарының сауалдарына жауап берді. Солтүстік Қазақстан облысының Бәйтерек ауылында өткен кездесуде де кандидат сайлауалды тұғырнамасымен таныстырды. Халықпен кездесуде Әміржан Қосанов сайлауалды платформасының негізгі бағыттарын атап, тұрғындарды толғандырған сұрақтарға жауап берді. Іс-шара барысында ауыл тұрғындары, ақсақалдар сөз сөйлеп, көзқарастарымен бөлісті. Бірқатар мәселенің шешу жолы талқыланды.
Талдықорғанда Әміржан Қосановты қолдауға арналған дөңгелек үстел өтті. Алматы облысының орталығындағы Мәдениет сарайында өткен іс-шараға 30-ға жуық адам, соның ішінде белсенділер мен қоғам қайраткерлері, облыстың ақсақалдар кеңесі, ардагерлер мен студенттер қатысты. Үміткердің сенімді өкілдері Әміржан Қосановтың сайлауалды бағдарламасын таныстырып, құжатта көрсетілген негізгі бағыттарды айқындады. Облыстық сайлау штабының бастығы Жүкел Хамай кандидаттың сайлауалды тұғырнамасын таныстырып, «Ұлттық дәстүрлерді дамыту және дәстүрлі құндылықтарды сақтау» тақырыбында сөз сөйледі.
Айдана БЕГІМ