Қазақстан президенттігіне кандидат Қасым-Жомарт Тоқаевтың Республикалық қоғамдық штабының үгіт-насихат жұмыстары Ақмола облысында жалғасты. Жергілікті Азаматтық қоғам институттары өкілдерімен кездесуде штаб мүшелері Қ.Тоқаевтың Елбасының ең сенімді серігі екеніне назар аударды.
– Қасым-Жомарт Тоқаев сыртқы саясатымызды қалыптастырып, мемлекеттік шекарамызды шегендеу ісінде үнемі Елбасының жанынан табылып, тәуелсіздігіміздің нығаюына үлкен үлес қосты. Қазақстанның ядролық қарудан бас тартып, әлемдік қауымдастықтың сеніміне ие болуына да кандидатымыз тікелей атсалысты. Сондықтан Елбасымыз Қасым-Жомарт Тоқаевты еліміздің тұрақты дамуын ары қарай жалғастырып, мемлекет тізгінін ұстауға лайық тұлға деп атады, – деді РҚШ басшысы Мәулен Әшімбаев.
Сондай-ақ РҚШ мүшелері «Көкшетау минералды сулар» АҚ-ның еңбек ұжымымен кездесіп, Қ.Тоқаевтың сайлауалды бағдарламасымен таныстырды.
– Кандидатымыздың сайлауалды бағдарламасы сабақтастық, әділдік және өрлеу деген негізгі үш қағидаға табан тірейді. Сол арқылы Қасым-Жомарт Тоқаев Елбасы саясатын ары қарай жалғастырып, ел дамуын қамтамасыз етуді, баршаға ортақ игілік қалыптастырып, экономикалық жетістіктерімізді әр қазақстандықтың сезінуіне жағдай жасауды және заман көшіне ілесіп қана қоймай, оның алдыңғы легінде жүруге ұмтылып, үнемі өрлеп, өркендеуді көздеп отыр, – деді Мәулен Әшімбаев.
Өңірдегі үгіт-насихат жұмыстары Ш.Уәлиханов атындағы Көкшетау мемлекеттік университетінде, «Қазақстан темір жолы» АҚ-ның еңбек ұжымында және Щучинскідегі туризм саласында еңбек етіп жүрген шағын және орта бизнес өкілдерімен кездесуге ұласты.
Ал кеше РҚШ мүшелері Қызылжар өңіріне келді. Облыс жұртшылығымен кездескен штаб мүшелері «Зенченко и К» ауылшаруашылық кәсіпорнының еңбек ұжымына ат басын тіреді. Мұнда Қ.Тоқаевтың сайлауалды бағдарламасында елімізде агроөнеркәсіптік кешеннің бәсекеге қабілеттілігін арттыру, ауыл тұрғындарының өмір сүру сапасын жақсарту, «Ауыл – ел бесігі» жобасы аясында ауылшаруашылық өнімдерін өндіретін кәсіпорындарға жүйелі қолдау қамтылғанын жеткізді. Бұл күні Петропавл қаласында кандидат Қ.Тоқаевты қолдаған 2500 адам қатысқан форум өтті.
Айдана БЕГІМ