Жаңа президентіміз Қазақстан халқына осы уақытқа дейін айтып келе жатқан бағдарламасы мен бағытына қатысты сауалдарға мардымды әрі тұшымды жауап берді
– Бүгін президент сайлауында жеңіске жеткен Қасым-Жомарт Кемелұлының ұлықтау рәсіміне қатыстыңыз. Айтулы шарадан қандай әсер алдыңыз?
– Халықтың көптен күткен сәті мәресіне жетті. Қазақстан Республикасының жаңа президенті – Қасым-Жомарт Кемелұлының ұлықтау рәсімі салтанатты жағдайда өтті. Қоғам талабына сай, шынайы өткен жиындардың бірі болды. Жаңа президентіміз Қазақстан халқына осы уақытқа дейін айтып келе жатқан бағдарламасы мен бағытына қатысты сауалдарға мардымды әрі тұшымды жауап берді. Халық көкейінде жүрген мәселені қозғап, ел мүддесін аянбай қорғайтынын айтты.
– Қасым-Жомарт Кемелұлының кәсіби біліктілігі мен саяси салмағын қалай бағалайсыз?
– Қасым-Жомарт Кемелұлын бұрыннан танимын. Ол – еңбекқор, үнемі халық арасында жүретін зиялы тұлға. Нағыз көш бастауға лайық мінез-қалыбы бар адам. Халыққа жақындығы, олардың мақсат-мүддесін тыңдап, мәселесін шешуге тырысатыны тағы бар. Екінші президентіміздің «сөзден нақты іске көшу керек» дегені көпшілік көңілінен шықты. Елдің санасын цифрмен алдаусырата бермей, әлеуметтік-саяси және рухани салада атқарылатын шаралардың нақты нәтижесін көрсету аса маңызды. Қасым-Жомарт Кемелұлы жұмысында осындай әдісті басшылыққа алғалы отыр. Ол жемқорлыққа қарсы күресті күшейтінін, бұл мәселенің түйінін тарқату үшін қыркүйек айына дейін Парламентке нақты тапсырмалар жүктейтінін айтып, ерекше үміт сыйлады.
– Қазақстанның жаңа президенті басшылыққа алған саясаттан не күтесіз?
– Мен жаңа президент жүргізетін саясат елді өрлеу мен даму жолына бастайды деп сенемін. Өйткені Қасым-Жомарт Кемелұлы – үлкен саяси мектептен өтіп, халықаралық дипломатияның шыңын бағындырған тұлға. Қазір «дипломатия» сөзін тек сыртқы саясатқа қатысты қолданып жүр. Шын мәнінде, ішкі саясатта да дипломатия керек. Бір әулеттің ішінде аласы мен қарасы бар десек, дипломатия осы екі тарапты да тыңдап, өзара келісімге шақыратын дұрыс шешім қабылдауды білдіреді. Қасым-Жомарт Кемелұлының жоғары лауазымды қызметтерде жүріп жиған тәжірибесі Елбасы негізін салған жолды жалғауда оған үлкен көмек болады деп ойлаймын.