Аудан әкімі алдымен Жаңақазан ауылында орналасқан М.Жүнісов атындағы жалпы орта білім беретін мектебінің күрделі жөндеу жұмыстарын тексерді. Мектепте қазіргі кезде 347-ден астам бала оқиды. Мұғалімдер саны – 64. Жергілікті тұрғындар арасынан 27 адам жұмысқа тартылған. Оқу орнына соңғы күрделі жөндеу жұмысы 2009 жылы жасалса, 2018 жылы М.Жүнісов атындағы жалпы орта білім беретін мектебінің 150 жылдығы тойланып, жаңадан мәжіліс залы, мұражай, спорт алаңы салынған.
Бұдан соң Наурызбай Қарағойшин Пятимар ауылында болып, Пятимар жалпы орта білім беретін мектебінің күрделі жөндеу жұмыстарымен танысып, мектеп ішін толық аралап шықты. Аталған білім ордасында 1-11- сыныптарда 180 оқушы, мектепалды даярлық тобын қосқанда 204 оқушы оқыса, мектеп жанындағы жатақханада 19 тәрбиеленуші, шағын орталықта 50 бүлдіршін тәрбиеленуде. Мектепте күрделі жөндеу жұмыстары осыдан 13 жыл бұрын жасалғаны белгілі болды.
Айта кетейік, республикалық бюджеттен М.Жүнісов атындағы орта мектепке – 215 млн 746 мың теңге, Пятимар орта мектебіне 422 млн 274 мың теңге көлемінде қаражат бөлінген. Іссапар барысында аудандық филиал төрағасы, аудан әкімі Н.Қарағойшин мердігермен және жұмысшылармен сөйлесіп, жөндеу жұмыстарына қатысты бірқатар тапсырма берді.
Бүгінгі таңда мектеп кабинеттерінде әрлеу жұмыстары, сонымен қатар сыртқы инженерлік желілер бойынша жұмыстар жүргізіліп жатыр. Қазіргі таңда аудан көлемінде 6 нысанда жөндеу жұмыстары жалғасуда.
