Павлодарда Nur Otan партиясы Павлодар облыстық филиалының төрағасы, облыс әкімі Болат Бақауовтың тапсырмасы бойынша, «Халыққа көмек» партиялық жобасын жүзеге асыру аясында облыстық филиалда «Ашық есік күні» өтті.
Шара барысында мемлекеттік органдардың (халықты әлеуметтік қорғау және жұмыспен қамту, білім беру, денсаулық сақтау, тұрғын үй-коммуналдық шаруашылық, әділет, прокуратура, еңбек, халыққа қызмет көрсету орталығы және «Атамекен» ұлттық кәсіпкерлер палатасы) қызметкерлері халыққа консультациялық-түсіндіру жұмысын өткізді.
Кездесуде 50-ден астам адам Nur Otan Павлодар облыстық филиалы төрағасының орынбасары Николай Дычко мен облыстың мемлекеттік органдарының өкілдеріне өздерін толғандырып жүрген сұрақтарын қою мүмкіндігіне ие болды.
– Мемлекеттік органдардың және әлеуметтік мекемелердің тұрғындармен өзара байланысының артуына, олардың арасындағы қарым-қатынастың жақсаруына халықпен өткізген кездесулер оң әсер етеді. Әсіресе, «Ашық есік күні» секілді іс-шаралардың жөні бір бөлек. Мұндай кездесулерде түрлі тақырыптағы әңгімелер талқыланып, соның негізінде туындаған сұрақтарға толық жауап беріліп, күрделі мәселелер шешімін тауып жатады. Өңірде жүзеге асырылып жатқан «Халыққа көмек» партиялық жобасы қоғамның сұраныстарына жедел ден қоюға, оған мемлекеттік органдардың назарын аударуға бағытталған. Осыған орай, халықпен тиімді кері байланысты қалыптастыру мақсатында Nur Otan партиясының Павлодар облыстық филиалының төрағасы Болат Бақауов «Ашық есік күнін» өткізу туралы шешім қабылдады, – деді Н.Дычко.
Еңбек, әлеуметтік қорғау, білім беру, денсаулық сақтау және заң қызметі басқармаларының өкілдеріне халық көп келді. Бірқатар мәселелер бойынша кеңестер мен заң нормаларын түсіндіру сол сәтте жүзеге асырылды, ал одан ары қарауды талап ететін мәселелер мемлекеттік органдардың бақылауына алынды. Партияның облыстық, қалалық және аудандық филиалдарында барлығы екі жүзге жуық өңір тұрғындары қабылдауда болды.