Нұр-Сұлтанда шайбалы хоккейден Қазақстан Президенті кубогы басталды. Nur Otan партиясы мен Қазақстан хоккей федерациясының қолдауымен өтіп жатқан турнирді елордалық «Барыс» сәтті бастады. Алаң иелері ағашқы кездесуде Ресейдің «Ақ Барс» (Қазан) командасын ірі есеппен жеңді.
«Барыс-Аренада» өткен ойынды Президент Қасым-Жомарт Тоқаев, Мәжіліс төрағасы Нұрлан Нығматулин, Премьер-министр Асқар Мамин, Президент әкімшілігінің басшысы Қырымбек Көшербаев және Нұр-Сұлтан әкімі Алтай Көлгінов тамашалап, жергілікті командаға жанкүйер болды. Кездесуден кейін әлеуметтік желіде Қасым-Жомарт Кемелұлы «Барысты» сенімді жеңісімен құттықтады.
Президент twitter парақшасында «Қазақстан Президенті кубогына арналған Х шайбалы хоккей халықаралық турнирінің ашылу салтанатына қатыстым. Қазақстан, Ресей командалары қатысуда. Біздің «Барыс» қазандық «Ақ Барстан» 6:1 есебімен басым түсті. Қыркүйекте ҚХЛ-дың кезекті маусымы басталады. Алға, «Барыс!» деп жазды.
Осымен оныншы рет ұйымдастырылып отырған Қазақстан Президенті кубогының маңызы жыл өткен сайын артып келеді. Оны аренаға келген адамдардың қарасынан-ақ байқауға болады. Өз командасына қызу қолдау білдірген елордалық жанкүйерлер ойыншыларды алға жетелеумен болды. «Барыс» хоккей клубының бас бапкері Андрей Скабелка шәкірттері айдынға шығысымен көрермендер қолдауын сезінді. Содан да болар кездесуді алаң қожайындары шабуылмен бастады. Екі кезеңде де ойын тізгінін қонақтарға берген жоқ.
Ойындағы алғашқы шайбаны «Барыс» сапынан 7-минутта Никита Михайлис соқты. Дегенмен жанкүйерлер қуанышы ұзаққа созылмады. 11-минутта қазандық клуб сапынан «Барыстың» бұрынғы ойыншысы Мэтт Фрэттин таразы басын теңестіріп кетті. Айдындағы ойын қарымта шайбадан кейін қыза түсті. Әрмен қарай басымдық барыстықтарда болды. Кездесудің 16-минутында Кирилл Панюков қақпаны дәл көздеп, елордалық клубты алға шығарды. Араға екі минут салып «Барыс» қатарына биыл қосылған канадалық Адам Хелевка есепті еселеді. Тартысты өткен бірінші кезеңде 3:1 есебі тіркелді.
Екінші кезеңде де Андрея Скабелка баптайтын «Барыс» командасы ойынды толықтай өз қолына алды. Қос қапталмен де белсенді шабуылдап, қақпаға сериалы соққыларды үсті-үстіне бағыттады. Ал «Ақ Барс» екінші кезеңнің басым бөлігінде қорғанумен болды. 28-минутта Дастин Бойд мергендік танытса, 31-минутта Даррен Диц қарсыластар қақпасынан саңылау тапты. Екінші кезең аяқталар тұста Батырлан Мұратов өзінің дебюттік ойынындағы алғашқы голын соқты. Есеп 6:1.
Шешуші кезеңде шайба соғылмады. Командалар қанша шабуылдаса да, қақпаның саңылауын таба алмады. «Барыс» турнирдегі алғашқы кездесуінде «Ақ Барс» командасын айқын басымдықпен жеңіп, бабында екенін байқатты.
Бұл күні «Барыс-Аренада» тағы бір кездесу өтті. Ресейдің қос командасы – Екатеринбургтің «Автомобилисті» Нижнекамскінің «Нефтехимик» командасын 5:1 есебімен ойсырата жеңді.
Айта кетейік, бұған дейін «Барыс» төрт рет турнир жеңімпазы атанған. Сондай-ақ СКА, «Авангард», «Нефтехимик», «Амур» және «Металлург» командалары да кубокты бір рет төбесіне көтерген. Қазақстан Президенті кубогы ойындары 8-11 тамыз аралығында өткізіледі. Жарысқа барлығы бес команда қатысуда. «Барыс» ендігі кездесуін «Нефтехимикпен» өткізеді, ал «Ақ Барс» «Салават Юлаевпен» (Уфа) кездеседі. Суреттерді түсірген: Советбек Мағзұмов