Елордада Тұңғыш Президент – Елбасы Нұрсұлтан Назарбаевтың төрағалығымен өткен Nur Otan партиясы Саяси кеңесінің кеңейтілген отырысына Мемлекет басшысы Қасым-Жомарт Тоқаев, Премьер-министр Асқар Мамин, Саяси кеңес бюросының мүшелері, Мәжіліс пен мәслихаттағы фракция өкілдері, облыстардағы филиалдардың жетекшілері қатысты.
Жиынға төрағалық еткен Нұрсұлтан Назарбаев еліміздегі жетекші партияның Тәуелсіздік жылдарында атқарған жұмыстарына оң баға беріп, оның барлығын халық көріп отырғанын айтты. Кеңесте күн тәртібіне сәйкес партия бағдарламаларының орындалу барысы, партия жұмысын жаңғырту мен алдағы кезеңге арналған жұмыстың басым бағыттары қаралып, Саяси кеңес бюросының құрамына өзгерістер енгізу мәселесі талқыланды. Отырыс барысында Елбасы барлық азаматты мемлекеттің өткір әлеуметтік-экономикалық проблемаларын шешу үшін партияға қосылуға шақырды. Сондай-ақ ел аймақтарындағы азаматтардың проблемаларын шешуде партияның жұмысын жандандыру қажетін ерекше атап өтті. Nur Otan партиясының Төрағасы бірінші кезекте қоғамның партияға сенімін арттыру мақсатында ақпараттық-идеологиялық стратегияны қабылдаудың маңызына баса назар аударды.
– Бүгін біз ел дамуының негізгі бағыттары бойынша біраз мәселе туралы айтатын боламыз. Партия мүшелерінің қатысуымен Саяси кеңестің кеңейтілген отырысына жиналып отырмыз. Үкімет мүшелері, партияның Мәжілістегі фракциясы, облыстардағы филиалдардың жетекшілері қатысып отыр. Биыл партиямыз үшін, еліміз үшін ауқымды жұмыс атқарылып жатқанын білеміз. Екі съезд өткіздік, партиямыздың 20 жылдығын атап өттік. Маусым айында Президент сайлауында біздің кандидатымыз Қасым-Жомарт Тоқаев жеңіске жетті, – деді
жиынды кіріспе сөзімен ашқан Елбасы.
Осыдан кейін партияның сайлауалды бағдарламасының жүзеге асырылу барысы жайында баяндама жасаған Үкімет басшысы Асқар Мамин Елбасы тапсырған «Әлеуметтік қамқорлық» әлеуметтік шараларының қалай жүзеге асырылып жатқанына тоқталды.
– Сіздің тапсырмаңыз бойынша, осы жылдың 1 сәуірінен бастап АӘК көлемі артты. 1 шілдеден бастап бала кезінен мүгедек балаларды бағу үшін мемлекеттік жәрдемақының көлемі ұлғайды. 1 маусымнан жалақысы аз бюджет қызметкерлерінің айлығы 30 пайызға дейін көтерілді. Ал жергілікті атқарушы органдардағы қызметкерлердің жалақысы 25 пайызға көбейді. «Нұрлы жер» бағдарламасына өзгерістер енгізіліп, Тұрғын үй жинақ банкі арқылы аз қамтылған отбасыларға жеңілдетілген несиелеу жүйесі іске қосылды. Бұл механизм осы жылдың шілдесінде бастап іске қосылды, алдағы үш жылда бұл бағытта 50 млрд теңгеден бөлінеді, – деді Асқар Мамин.
Оның атап өтуінше, осы жылдың 1 қыркүйегінен бастап жоғары курстардағы 100 мың студент тегін түрде ЖОО-лар жанындағы кәсіпкерлік негізін оқи алады. Кәсіпкерлік бастамаларды қолдау мақсатында микронесиелеу шығындары 83 млрд теңгеге дейін артты. Ал жаңа бизнес идеяларды іске асыру үшін 18 мың азаматқа 18 млрд теңге көлемінде мемлекеттік грант бөлінеді. Азаматтарды жұмыспен қамту бағдарламаларына көптеп тарту үшін Нұр-Сұлтан, Алматы, Шымкент қалаларында 15 мобильді жұмыспен қамту орталығы ашылған. Жыл соңына дейін ондай орталықтар тағы 15 жерде жұмысын бастайды.
Кеңесте Nur Otan партиясының Төрағасы алдағы сайлаудың конституциялық мерзімде өтетіндігін тағы бір мәрте атап өтті.
– Қазір Үкімет пен бүкіл атқарушы билік білек сыбанып, Nur Otan партиясы мен жаңадан сайланған Президент Қасым-Жомарт Тоқаевтың сайлауалды уәделерін орындауға, адамдардың нақты проблемаларын шешуі тиіс. Ең алдымен, өңірлерде жұртшылықпен тығыз жұмыс істеуі қажет, – деді Нұрсұлтан Назарбаев.
Елбасы партияның 2050 жылға дейін қабылданған бағдарламасында Қазақстанның дамыған 30 елдің қатарына кіру мақсаты қойылғанын еске салды. Индустриялық, инфрақұрылымдық бағдарламалар, ауыл шаруашылығы, үй құрылысы, медицина, халықты ағарту жұмыстары бойынша мақсатқа жету керек екенін баса айтты. Қазақстанның Тұңғыш Президенті «Сенім. Диалог. Болашаққа нық қадам – Nur Otan партиясының 7 серпіні» атты партия жұмысын жүйелі жаңғырту бағдарламасын көпшілік назарына ұсынды. Атап айтқанда, Елбасы бағдарламаға сәйкес партияның белсенді мүшелерін топтастыру, жемқорлықпен күресті күшейту және партиядан лайықты емес мүшелерді шығару үшін тиісті шара қабылдауды, партия органдарының әлеуетін арттыруды, биліктің барлық деңгейінде партиялық жауапкершілікті күшейтуді тапсырды.
– Партияның Мәжілістегі фракциясының жұмысын барынша күшейту керек. Бұл партия міндеттерін орындаудың және атқарушы органдарға ықпал етудің негізгі тетігі. Фракцияның мәртебесін көтеру үшін оның жетекшісі лауазымына Мәжіліс төрағасы Нығматуллин Нұрлан Зайроллаұлын сайлауды ұсынамын. Ол Мәжілістің спикері ретінде алға қойылған мақсаттарға қол жеткізу және фракция жұмысын қайта жандандыру үшін барлық ресурсты жұмылдыра алады, – деді Елбасы.
Сонымен қатар партия Төрағасы халықпен нақты жұмыс істеу қағидатын енгізуді, қарқынды ақпараттық-идеологиялық жұмысты ұйымдастыруды және партия төңірегіне жастарды біріктіру үшін тиісті шара қабылдау керек екенін баса айтты.
– Қазіргі таңда «жаңа» медиа саласында шындыққа жанаспайтын ақпарат таратушы арналар көбейіп келеді. Жергілікті, қарапайым мәселелер республикалық деңгейге дейін көтерілуде. Қоғамдық санада жалған түсінік қалыптасуда. Nur Otan өзінің ақпараттық стратегиясын түбегейлі қайта қарауы қажет. Партияның бұқаралық ақпарат құралдары объективті және жедел ақпарат көздеріне айналып, халықтың сеніміне ие болуға тиіс, – деді Nur Otan партиясының Төрағасы.
Нұрсұлтан Назарбаев партияның жүзеге асырып отырған сәтті жобаларына оң бағасын беріп, олардың ішінде «Ардагерлерді ардақтайық» секілді игілікті жобалардың да бар екенін тілге тиек етті. Сондай-ақ кеңес отырысында «Рухани жаңғыру», «Ұлы даланың жеті қыры» мақалаларының маңызы да айтылды.
– Көпбалалы аналар үшін «Бақытты отбасы» деген орталықтар ашылуда. Оларды көбейтіп, жұмысын жүргізу керек. Осындай тәжірибелерді жаппай енгізген жөн. Мәселен, «Мирас» қоғамдық кеңесінің әлеуетін пайдаланып, зиялы қауымды рухани мәселелерді шешуге жұмылдыру керек. Зиялы қауым дегеніміз «мен жазушымын немесе композитормын» деп, тек сынаумен ғана отыруы керек пе? Зиялы қауым – халықтың алдында жүретін, жол көрсететін бастаушысы болуы керек, – деді Елбасы.
Отырыс барысында Партия Саяси кеңесі Бюросының жаңа мүшелері ретінде «Егемен Қазақстан» республикалық газетінің басқарма төрағасы Дархан Қыдырәлі және Jas Otan Жастар қанатының көшбасшысы Дәулет Кәрібек сайланды. Ұсынысты партияластар бірауыздан қолдады.
Нұрсұлтан Назарбаев әкімдердің партиялық жұмысына көңілі толмайтынын айтып, барлық деңгейдегі әкімдерге партия жұмысына апта, ай сайын көңіл бөліп, беделін арттырып отыру қажеттігін ескертті. Министрлер мен әкімдерді проблемаларды жасырмауға шақырды.
Елбасы шағын проблемаларды жедел шешу қажеттігіне назар аударды. – Адамдарды өміріндегі ең кішкентай мәселелер толғандырады. Мәселен, су жоқ. Бұл әкім үшін деңгей емес қой, иә? Сумен айналысудың қажеті қанша? Ал адамдар үшін – бұл өмірінің мәні. Ауылда жол жоқ. Бұл ол үшін – өмірі, ал біздер үшін – болмашы нәрсе. Біздер жаһандық мәселелерге құлаш сермейміз. Сондықтан адамдарға жақын болуымыз керек. Партияның қоғамдық қабылдаулары жұмыс істеуі тиіс, – деді Н.Назарбаев.
Елбасы жиында сондай-ақ, мәжіліс пен мәслихат депутаттары арасында жастар көбірек болуы керегін мәлім етті.
– Партия өзінің жас буынына қашан да зор көңіл бөліп келеді. Төрт жыл бұрын 2020 жылға дейінгі «Жастар Отанға» деген бағдарламаны қабылдаған болатынбыз. Биылғы жыл Жастар жылы деп жарияланды. Алайда, қолдау шаралары жеткілікті дәрежеде күткен нәтижені берген жоқ. Шешілмеген сұрақтар көбейіп кетті. Жемқорлық, баспана мәселесі, жұмысқа тұру – партия бұл мәселелердің барлығын назарына алуы тиіс, – деді ол.
Кеңес отырысында келешегі жоқ ауылдар туралы да әңгіме қозғалды. Бұл орайда болашағы жоқ ауылдардың тұрғындарын келешегі зор елдімекендерге көшірген жөн екенін тілге тиек етті. Әсіресе бұл мәселе бойынша үлкен бюджет қаражаты келешегі жоқ елдімекендерді ұстауға жұмсалатынын, оның өнімсіз екеніне тоқталды.
Партия Төрағасы өз кезегінде «Болашақ» бағдарламасы бойынша оқып келгендерге де мүмкіндік беру керегін айту барысында бір кездері «Болашақ» бойынша оқу бітіріп келгендер жаппай облыстарға тарап, еңбек еткенін еске алды.
– Болашақ» қауымдастығында үлкен әлеует бар. Қауымдастық қазіргі таңда 10 мың адамды біріктіріп отыр. Бәрін де бір кездері мемлекет оқуға жіберді. Ал қазір ата-аналар балаларын шетелде оқытуға одан ары құмар. Бүгінгі таңда Қазақстан сыртында біздің 60 мыңға тарта отандасымыз оқып жатыр. Тіпті, одан да көп болуы мүмкін. Ресейдің өзінде ғана – 16 мың. Олар келіп, жұмысын істейді. Олармен жұмысты жалғастыру керек. Олар аудан және облыс әкімдерінің орынбасары болды. Неліктен бұл жұмыс тоқтап қалды? Міне, мәселен, біз оқуға жібергендердің бірі – Алтай Көлгінов. Кезінде біз оны арнайы оқуға жібердік, ал бүгін ол қала басшылығында отыр. Осындай азаматтар көп. Бәрін не үшін дайындадық? Қазір отырып алып, орындықты бергіміз келмейді. Олардың жақсырақ жұмыс істейтінін көріп отырмыз. Әйтпесе, бір жерге тоқтап, дамымай қаламыз. Сол себепті, келесі жылдың көктемінде өтетін Jas Otan съезінде білімді жастарды жұмылдыруды талқылауды ұсынамын – деді Тұңғыш Президент.
Жалпы, Nur Otan партиясы Саяси кеңесінің кеңейтілген отырысында бірқатар көпшілікті алаңдататын көкейтесті мәселелер талқыланып, кемшіліктер сараланды. Тұңғыш Президент Нұрсұлтан Назарбаев жаңа жобаларды тиімді жүзеге асырудың және Үкімет пен Nur Otan партиясының алдына қойылған міндеттердің маңызына тоқталып, бағдарламаны жүзеге асыру тетіктерін бекіту жайлы партия аппаратына бірқатар тапсырма жүктеді.
Нұртөре ЖҮСІП,
Сенат депутаты:
– Саяси кеңестің кеңейтілген отырысында еліміздегі ең өзекті мәселелер талқыланды. Елбасы нақты міндеттерді белгілеп берді. Оның ішінде 2050 жылға дейінгі аралықта біз әлемдегі ең озық 30 елдің қатарына қосылу деген ұлттық міндет бар. Сол жолда қазақ қоғамының, тәуелсіз елдің бағыт-бағдары деген мәселелерге нақты жауаптар алдық. Соның ішінде қоғамның ашықтығы: қиындықтарды, түйткілді мәселелерді бүкпесіз ашық айту және шешу міндеттелді. Ауылға, жастарға, кәсіпкерлікке және өзге көптеген негізгі мәселелерге қатысты әңгімелер ашық айтылды. Ұсыныстар да ескерілді. Партияның бастауыш ұйымдарының жұмысын жандандыру, депутаттық корпустың жұмысын осы заманға сай үйлестіру, осының барлығы үлкен өзгерістерге сай болу дегенді білдіреді. Сол бағытта ұйымшылдықпен еңбек еткен жөн. Сенім орнығу үшін диалог керек, ал диалог дәйекті болу үшін болашақпен байланыс берік болғаны дұрыс. Қорыта айтқанда, осы мақсатта қабылданар нақты шешімдердің уақыты келді деп ойлаймын.
Нұржан ӘЛТАЕВ,
Мәжіліс депутаты:
– Nur Otan партиясының Төрағасы Нұрсұлтан Назарбаевтың жетекшілігімен өткен Саяси кеңестің кеңейтілген отырысында ең өзекті деген мәселелер көтерілді. Осы орайда Nur Otan партиясы өте белсенді, алдыңғы қатарлы қоғамдық күштердің біріне айналуы керек. Біз енді биліктің партиясы болғандықтан жүктелер міндет пен жауапкершілік те жоғары.
Цифрландыру заманында әртүрлі озық технологиялардың мүмкіндігін пайдалана білгеніміз жөн. Осы ретте мәжіліске келгелі бері өзімнің онлайн қабылдау бөлімімді аштым. Сол арқылы әр аймақтың тұрғындары хабарласып, түрлі мәселелер бойынша өтініш-тілектерін жолдады. Мұның бір артықшылығы тұрғындар мәселелерін айту үшін Нұр-Сұлтанға келмей-ақ, онлайн ресурстар арқылы жазбаша жазып жібереді. Біз өз кезегімізде барлық мәселелерді қарап, тұрғындар сұрағына жауап беруге, мәселелерінің оң шешімін табуына ықпал етеміз.
Ибадулла ҚҰТТЫҚОЖАЕВ,
Nur Otan партиясы Қызылорда облыстық
мәслихаттағы фракция жетекшісі:
– Партия Төрағасы Нұрсұлтан Назарбаев Саяси кеңестің кеңейтілген отырысында жергілікті жерлердегі, мәслихаттағы депутаттық фракцияның жұмысын күшейту қажеттігін атап өтті. Шын мәнінде қазіргі қоғамдағы сын-қатерлердің алдын алуда, оны еңсеруде, қабылданған бағдарламалардың орындалуын, жергілікті жерлердегі тұрғындарды толғандыратын мәселелерді шешуде фракция мүшелері өздерінің қажыр-қайратын таныту қажет. Сондай-ақ халықтың арасына жиі барып, олармен түрлі кездесулер, қабылдаулар өткізу, түрлі шараларды, көшпелі отырыстарды өткізу бұл халық пен партияның жақындығын білдіреді. Бұл жерде фракция мүшелері белсенділік танытып отыр. Олар
Nur Otan партиясының халықтық партия екенін көрсетуге атсалысады деген ойдамын. Өйткені партияның алдына қойған мақсаты – халықтың тұрмыстық жағдайын жақсарту, әл-ауқатын арттыру. Осы бағытта барлық жергілікті жерлердегі маслихат депутаттары алдарына қойған міндеттерін жоғары деңгейде орындайтынына сенемін.
Лаура ДЕМЕСІНОВА,
«Болашақ» қауымдастығының
атқарушы директоры:
– Елбасы Н. Назарбаевтың төрағалығымен өткен Nur Otan партиясы Саяси кеңесінің кеңейтілген отырысында маңызды мәселелер талқыланып, өзекті ойлар ортаға салынды. Жиында Елбасы өңір әкімдеріне Ұлт жоспарын, қабылдаған әлеуметтік міндеттемелерді тиімді орындау, жұмыспен қамту және халықтың мұң-мұқтажына уақытылы назар аудару, сондай-ақ жергілікті жерлерде идеологиялық жұмыстарды жақсарту жөнінде бірқатар міндеттер жүктеді. Кеңесі отырысының қорытындысы бойынша әр саланың басшыларына тапсырмалар берілді. Бұл орайда «Болашақ» қауымдастығы, «Болашақ» түлектері де Елбасының барлық бастамасын қолдап, оны жүзеге асыру үшін бірлесе жұмыс атқаратын болады.
Ғалиасқар САРЫБАЕВ,
Алматы облыстық филиалы
төрағасының бірінші орынбасары:
– Бүгінгі шарада партияның жаңғырту жұмыстары қаралды. Соған байланысты Елбасының тапсырмасы бойынша біз халық пен биліктің арасындағы алтын көпірге айналуымыз керек. Әрқашан бірігіп жұмыс істеуіміз қажет. Қарапайым халықтың мүддесінен шығуға тырысамыз. Сонымен қатар партияның стратегиясын жаңа бағытқа бағыттай отырып партия ұйымдарының жұмысын алға шығарамыз. Себебі өздеріңіз білесіздер, кез келген партияның негізін құрайтын ұйым – Бастауыш партиялар. Бастауыш партия ұйымдарының жетекшілері халықпен тікелей жұмыс істейді. Сол бағыттағы жұмыстарды жүргіземіз. Сонымен қатар қарапайым халықтың құқығын қорғау үшін жұмыла әрекет етеміз. Сыбайлас жемқорлықпен күрес бойынша біздің арнайы комиссиялар бар. Солардың қызметін жандандырамыз. Себебі сыбайлас жемқорлықты түбімен жоймасақ та, алдын алу шараларын жүргізу маңызды. Сонымен қатар өздеріңіз білесіздер партияның қоғамдық қабылдаулары бар. Қоғамдық қабылдауларға тұрғындар шешілмеген мәселелері бойынша жиі хабарласады. Партия жарғысына сәйкес жергілікті атқарушы органдарға өзіміздің ықпалымызды жүргіземіз. Сол ықпалды халықтың әлеуметін арттыру үшін, жағдайын жақсарту мақсатында іске асыратын боламыз.
Сондай-ақ кеңесте көтерілген мәселелердің бірі – жастар мәселесі. Елбасы 2019 жылды – Жастар жылы деп бекітті. Бұл олар үшін үлкен мүмкіндік. Ел болашағы жастардың қолында. Біз алдағы уақытта жастармен жұмысты күшейтетін боламыз. Сөз соңында айтпағым, әрбір партия мүшесі өзіне жүктелген міндетті жоғары деңгейде атқарып, партияның жаңғырту жұмыстарына өз үлестерін қосады деген сенімдемін.
Дәулет КӘРІБЕК,
Jas Otan Жастар қанатының төрағасы:
– Жастар – Nur Otan партиясы саясатының ажырамас бір бөлігі. Сондықтан да қазіргі таңда партия жанынан құрылған Jas Otan Жастар қанатының жұмысы белсенді, қызу түрде жүргізілуде. Алдағы уақытта жастарға арналған партия тарапынан әлеуметтік лифтілердің жұмыс істеуі қолға алынады. Одан бөлек шығармашыл, талантты, өз мәселелерінің шешімін таппақшы болып жүрген, тұлғалық дамуға көңіл бөлетін жастардың барлығына қолдау көрсету жұмысы жаңа деңгейде жүзеге асады.
Ең бірінші ауыл жастарымен бірлесе жұмыс істеу, одан бөлек мәслихаттарда жастардың үлесін көтеру арқылы жастар мәселесін шешуге жастардың өзін тікелей тарту өте дұрыс шешім. Бұл партияның ілгерілеуіне жол ашып, жастардың өзін көрсетуіне де үлкен мүмкіндік болмақ.