Атырауда «Алтын тұлпар – Жайық жағасында» V республикалық турнирі өтті. Елу бір шақырымдық аламан бәйгеде қызылордалық сәйгүлік жеңіске жетті.
Мұнайлы аймақта Қазақстанның Тұңғыш Президенті, Елбасы Н.Назарбаевтың «Рухани жаңғыру» бағдарламасы аясында, Nur Otan партиясының қолдауымен, Ұлттық спорт қауымдастығы мен Атырау облыстық әкімдігінің бірлесе ұйымдастыруымен Махамбет ауданы Талдыкөл елді мекенінде «Алтын тұлпар» аламан бәйгесі өтті.
Бұған дейін Нұр-Сұлтан қаласында өткізіліп келген «Алтын тұлпар» бәйгесін ұйымдастырушылар алқасы оны елорда төңірегінде ғана емес, еліміздің басқа өңірлерінде де өткізген жөн деп шешім қабылдаған.
«Алтын тұлпар» бәйгесі Қазақстанның ең үздік сәйгүліктері қатысатын, айтулы атбегілердің асыға күтетін мерекесіне айналды.
Атырауда өткен V республикалық «Алтын тұлпар – Жайық жағасында» бәйгесінде ағылшын-араб тұқымдас «Қоянқасқа» мәре сызығын бірінші болып кесті.
Турнирге Қазақстанның 12 облысынан келген 40 үздік ат пен шабандоздар қатысты. Турнир аясында 7, 12, 25 және 51 шақырымдық қашықтықта төрт айналым өткізілді. Бәйгенің 10 миллион теңгелік бас жүлдесін шабандоз Ғалымнұр Ноғайбек, жаттықтырушы Қуат Абсалямов және ат иесі Бердібек Мыханов иеленді.
Жеңімпаздарға ақшалай сыйлықтарды Nur Otan партиясының хатшысы Ғабидолла Оспанқұлов, Атырау облысы әкімінің бірінші орынбасары Серік Шапкенов және Ұлттық спорт қауымдастығының хатшысы Нұрсұлтан Ибрагимов табыс етті.
– Бұған дейін «Алтын тұлпар» турнирінде оза шауып, жеңіске жеткен 4 жүлдегер де қазақстандық тұқымнан шыққан жылқылар еді. Ал бұл жолы жеңіс пен жүлдегерлер тек «шетелдік» арғымақтар болды. Спортшыларымызды жеңістерімен құттықтаймын, – деді Ұлттық спорт қауымдастығының хатшысы Нұрсұлтан Ибрагимов.
Айтарлығы Махамбет ауданының Талдыкөл ауылында «Алтын тұлпар» турнирімен қатар Атырау қаласы күніне арналған «Дарабоз – 2019» халықаралық турнирі өтті. «Дарабоз» турнирінің бағдарламасына көкпар, теңге алу, аударыспақ секілді 10 түрлі ұлттық ойын енгізілді.
Сайып келгенде, ұлы даланың ұлттық ойын түрлерінің тәрбие сабағы іспетті өтуі, жас ұрпақты ұлттық ойындарға, жарыстарға деген қызығушылығын ғана емес, бабадан қалған дәстүрді жанына сіңіріп өміршең етуіне ықпал етуде.
Атырау облысы