Бүгін қатты аязға байланысты бірінші ауысымдағы оқушыларға сабақ болмайды.
Білім басқармасының мәліметінше, мектепалды даярлық сыныбынан бастап 9-сыныпқа дейін сабақтар тоқтатылды.
«20 қараша күні ауа райының колайсыздығына байланысты (қатты жел мен көру мүмкіндігінің шектеулігі) қала мектептерінің бірінші ауысымындағы 0-9 сынып оқушылары үшін сабақ болмайды», - деп хабарлады Білім басқармасы.
Синоптиктердің мәліметінше, осы уақытта Нұр-Сұлтанда -27 градус аяз тұр. Айта кетейік, ауа райына байланысты оқу процесінің тоқтатылғаны жөнінде ақпаратты келесі дереккөздерден білуге болады:
1) Нұр-Сұлтан қалалық Төтенше жағдайлар департаментінің SMS-хабарламасы;
2) iKOMEK109 қалалық орталығының (109 нөміріне қоңырау соғу, немесе мобильдік қосымша мен чаттарына тіркеліп, хабарлама алу) ақпараты;
3) Қалалық Білім басқармасының ресми сайты.
4) Білім басқармасының Facebook-тегі ресми парақшасы.
5) Нұр-Сұлтан қаласы әкімдігінің ресми сайты.
6) Smart Astana қосымшасы (мобильдік қосымшасына тіркеліп, хабарлама алу).
Сонымен қатар ҚР ІІМ Төтенше жағдайлар комитеті Darmen мобильдік қосымшасынан білуге болады.