Украина президенті Владимир Зеленский Киевтегі қаңырап бос жатқан Хресчатык көшесінде түсірілген Жеңіс күніне арналған видеоүндеуін жариялады, – деп хабарлады "Украинская правда".
"Біз балаларымыз үшін, бостандық үшін күресіп жатырмыз, сондықтан біз жеңеміз. Сегіз миллионнан астам украиндық қаза тапқан Екінші дүниежүзілік соғыста ата-бабаларымыздың ерлігін ешқашан ұмытпаймыз. Жақында Украинада екі Жеңіс күні болады. Ал кейбіреуде оның бірі де қалмайды", – деді Владимир Зеленский.
Украина президенті ел тарихының ешбір бөлігін бөтенге беріп қоймайтынын айтты.
"Біз бүгін соғысып жатырмыз және ешкімге жеріміздің бөлігін беріп қоймаймыз. Бүгін біз нацизмді жеңген күнді тойлап жатырмыз және тарихымыздың титімдей бөлігін бөтенге бермейміз. Біз өзге халықтармен бірге антигитлерлік коалицияның құрамында нацизмді жеңген ата-бабаларымызды мақтан тұтамыз. Және бұл жеңісті ешкімге жекешелеп алуға, иеленіп кетуіне жол бермейміз", – деді Зеленский.
