Boxrec.com қазақстандық боксшылар Садриддин Ахмедов, Батыр Жүкембаев және Абылайхан Құсайыновты Алматыдағы жеңісінен кейін рейтингке қайтарды. Садриддин Ахмедов (13-0, 11 КО) бірінші раундта Оңтүстік Африкадан келген боксшы Нкулулеко Мхлонгоны (23-11-1, 18 КО) төрт рет нокдаунға жіберді. Одан кейін қарсыласы екінші раундқа шықпаймын деп шешті.
Бірінші орта салмақтағы BoxRec рейтингінде Ахмедов қазір 55-орында.
Батыр Жүкембаев (20-1, 16 КО) оңтүстікафрикалық Ксолани Мкотхелиді (19-8, 12 КО) үш рет нокдаунға жіберіп, алтыншы раундта техникалық нокаутпен жеңді.
Бірінші жартылай орта салмақтағы BoxRec рейтингінде Жүкембаев 67-орынға жайғасқан.
Соңында Абылайхан Құсайынов (12-0, 9 КО) тәжікстандық Бахтовар Сағызовты (0-4) жарақаттады, сөйтіп тәжік спортшысы екінші раундқа шығудан бас тартты.
Жеңіл салмақтағы BoxRec рейтингінде Құсайынов 383-орында тұр.
Айта кетейік, қазақстандық үш боксшы да бұрын сайттың рейтингінен шығып қалған болатын. Өйткені үшеуі ұзақ уақыт жекпе-жекке шықпады.
