Алматы облысының «Жасыл ел» жастар еңбек жасақтары 2020 жылы Jyl serpini номинациясын иеленіп, үздіктер қатарынан көрінген болатын. Биыл да сол қарқынынан тайған жоқ. «Жасыл ел» штабы ХVІI маусымдық еңбек жұмысын шілде айынан бастап, бүгінге дейін 944 жасты жұмыспен қамтып отыр.
Облыстық Жастар саясаты мәселелері жөніндегі басқарманың мәліметіне қарағанда, «Жасыл ел» құрамында ЖОО-ның 217 студенті, кәсіптік техникалық білім беру орталығының 304 студенті, 245 мектеп оқушысы, 178 жұмыссыз жас бар. 2021 жылы штаб жұмысына бюджеттен 151,6 млн теңгеге жуық қаржы бөлінген. Өткен бір айда облыс бойынша жастар «Жасыл бақ – таза қала», «Таза өзен – таза жағалау», «Жайқалсын жас терек», «Экодесант» акцияларын өткізіп, экологиялық тазарту шараларын атқарып, «Армысың, Ардагер», «Үлкенге құрмет – кішіге міндет» атты қамқорлық акциялары кезінде қарттарға жәрдем көрсетті. Жалпы, шілде айында жастардың қатысуымен облыс бойынша 156 шақырым арық аршылып, 301 гектар жердің шөбі шабылған, 176 гектар жер тазартылып, қоқысы шығарылған. Сонымен бірге өңірде студенттік құрылыс жасақтарының қызметі қайта жандана бастады. Бүгінде облыс көлеміндегі құрылыс жұмыстарында осындай отряд құрамындағы 211 жас жұмыс істеп жүр.Болат АБАҒАН, Алматы облысы