Қара металл сынықтарын жинайтын компания филиалының жетекшісі 2018 жылы 16 миллион теңге жымқырды деп айыпталып, 7 жылға сотталған болатын, — деп жазады «Диапазон» басылымы.
Жоғарғы сот қылмыстық істі зерттеп шыққан соң бірінші сатыдағы сот үкімінің күшін жойды. Айыпталушының құқығы бұзылғанын анықтап, оны Ақтөбе облыстық сотының апелляциялық алқасына жаңадан қарауға жіберді. Нәтижесінде сотталушының әрекетінде қылмыстық істің болмағаны анықталып, қарама-қарсы шешім шығарылды.
Ақталып шыққан Бардак К. сот арқылы мемлекеттен оған моральдық және материалдық залалды өтеуді талап етті. Ұзақ уақыт бойы ол басшылық лауазымдарда жұмыс істеді, коммерциялық қызметпен айналысты, үш баланы тәрбиелеп өсірді, үлгілі отбасының тірегі болды, бірақ оның беделіне нұқсан келіп, жасамаған қылмысы үшін айыпталды.
Сонымен қатар бас бостандығынан айырылғандықтан, ағасының жерлеу рәсіміне де қатыса алған жоқ. Осындай қиындықтардан өткені үшін ол 90 млн теңге өтемақы талап етті. Сондай-ақ ол өзін қорғау үшін адвокаттарға 3,5 миллион теңге жұмсаған. Бұл соманы да өтеуді талап етті.
«Сот оның талаптарын ішінара қанағаттандырды. Оның көрген қиындықтарын 20 млн теңгеге бағалады. Ал Қаржы министрлігін жазықсыз сотталған азаматқа 28 млн теңге төлеуге міндеттеді, бұл сомаға моральдық залал, заңдық шығындар және табысы үшін өтемақы кіреді. Әрине бұл миллиондардың барлығы салық төлеушілердің қаражатынан төленеді. Яғни, тергеушілер мен прокурорлардың қателігінен өтемақы халықтың қаражатынан алынады», - делінген метериалдың соңында.
