Мемлекет басшысы Павлодар облысына жұмыс сапары барысында Екібастұздағы теміржол кластерімен танысты. Бұл туралы Ақорданың баспасөз қызметі хабарлады.
Қасым-Жомарт Тоқаев алдымен «Проммашкомплект» теміржол дөңгелектерін шығаратын зауыттың жұмысымен танысып, өндіріс барысын көрседі, Президентке жұмысшыларды әлеуметтік қолдау шаралары, кәсіпорынның экспорттық әлеуеті мен одан әрі жаңғырту жоспары туралы мәлімет берілді.
2012 жылы салынған зауыт 700-ден 1250 мм-ге дейінгі әртүрлі диаметрлі және дискілі конструкциядағы теміржол дөңгелектерін шығарады. Зауыт жылына 300 мың дана өнім шығарады. Компанияда 750-ге жуық адам жұмыс істейді.
Бұдан кейін Президент серпінді клеммалар мен бұрандалар шығаратын «Ферротранстрейд» зауытын іске қосты.
– Бүгінде Екібастұз еліміздің теміржол машина жасау орталығына айналды. Қала кәсіпорындары өнеркәсіп өнімінің 73 пайызын құрайды. Олар жыл сайын теміржол саласына қажетті 85 миллиард теңгенің өнімін шығарады. Оның 70 пайызы экспортталады. Бүгін ТМД елдерінде баламасы жоқ «Ферротранстрейд» зауыты іске қосылды. Бұл жерден халықаралық сапа стандарттарына сәйкес келетін компоненттерді шығарады. Жаңа өндіріс толық күшіне енгеннен кейін «Қазақстан темір жолы» ұлттық компаниясы терминалдар мен бұрандаларды импорттамайтын болады– деді Қасым-Жомарт Тоқаев.
Мемлекет басшысы кәсіпорынның өнімдерінен жасалған көрмені аралап, зауыттың еңбек ұжымымен кездесті. Бұл жерде 160 адам жұмыс істейді. Зауыт жылына рельс бекітетін 3 миллион жинақ және 4,5 миллион дана полимерлі төсеу құралын шығарады.
