Елордадағы Сарыарқа әкімдігінде ESIRTKІGE JOL JOQ акциясы аясында 14-29 жас аралығындағы жастар арасында нашақорлық пен есірткі бизнесіне қарсы шаралар талқыланды.
Соңғы он жылда елімізде нашақорлар саны артып, оның ішінде жастар арасындағы есірткіге құмарлар қатары 13-14 есе көбейген. Мамандар нашақорлардың қатары күннен-күнге «жасарып» келе жатқанын айтып дабыл қағуда. Жиынға «Құқық» қоғамдық қорының директоры Ольга Рыль, «Есірткісіз ұлт» қауымдастығының төрағасы Әсия Шакаева, «Есірткісіз болашақ» қоғамдық қорының атқарушы директоры Жандос Ақтаев, «РЕНЕССАНС» оңалту орталығының директоры Ғалия Исаева, психолог Александр Рущук және Нұр-Сұлтан қаласының мәслихат депутаттары қатысты. Сарапшылар үкіметтік емес ұйымдармен жастар арасында профилактикалық жұмыстар жүргізу барысын жан-жақты талқылады.
Мәслихат депутаты Нұрлан Көпешов бұл мақсатта оқушылармен бір сарынды дәрістер өткізгенше, блогерлар арқылы есірткісіз қоғамды насихаттау жұмыстарын жүргізу нәтиже беретінін айтты.
«Жастардың көзайымына айналып бара жатқан Web-сериалдар түсіруді қолға алу керек. Блогер, жастар арасында танымал азаматтардың көмегімен нашақорлықтың түбі құрдым екенін көрсетсек тиімді болар еді. 60 баланы жинап алып, ұзақтан-ұзақ дәріс оқығанша, 20 минуттық сериалдар ой салады. Алайда ол сапасыз болмауы керек», – деді Н.Көпешов.
Ал «Құқық» қоғамдық қорының директоры Ольга Рыльдің айтуынша, туберкулезді ерте анықтау жұмыстары сияқты, барлық азамат есірткі сынамасынан өтуі тиіс. Себебі дәріханаларда сатылатын сынамалар бүгін теріс нәтиже көрсетсе, ертең оның есірткі қолданбайтынына кепілдік жоқ.
«Бізде есірткі қолданатын ата-аналардың статистикасы жоқ. Осыны қолға алу керек. Себебі отбасында есірткі көріп өскен бала міндетті түрде есірткі бизнесіне араласады. Ата-анасы сол ақшаға қымбат смартфон алып береді, соған киіндіреді. Осылайша бала ерте жастан жеңіл ақшаға өмір сүруді үйренеді», – дейді О.Рыль.
Осылайша, талай жеткіншек нашақорлық салдарынан қауіпті кеселдің құрбанына айналып жатыр. Спикердің айтуынша, мектептерде нашақорлықтың алдын алу шараларын психологсыз өткізу керісінше балаларды сол есірткіге еліктіруі мүмкін.
«Мектептегі сынып сағатынан кейін есірткіге қызығушылығым артып кетті деді бір оқушы. Яғни, психологсыз дәріс оқылмауы тиіс. Себебі алдын аламыз деп есірткі жиі айту насихаттаудың да бір түрі. Сондықтан мектеп қабырғасындағы директордан бастап мұғалімдерге дейін психология курстарын оқыса дейміз», – деп толықтырды «Құқық» қоғамдық қорының директоры.
Қорытындысында, есі кіргеннің де, есі әлі кірмегеннің де есін алатын есірткі бүгінгі күннің басты кеселіне айналды. Ал нашақорлықты жою – ауыр міндет. Ал онымен бірлесе күресу әрбір қоғам мүшесіне тиесілі.
