«AMANAT» партиясы Жуалы аудандық филиалының бастауыш партия ұйымдары бастамасымен партиялық жарналардан қайтарылған 20 пайызы трансферт қаржы есебінен «Ұлттық мұра» жобасы аясында Б.Момышұлы ауылында орналасқан орталық саябақта мәдени және спорттық іс-шаралар өтті.
Атап айтсақ, көрнекті ақын Мұхтар Шахановтың 80 жас мерейтойына орай оқырмандар арасында «Жыр мұхитының жүрдек кемесі» атты аудандық байқау ұйымдастырылды. Үш кезеңнен тұратын байқауға барлығы 15 үміткер қатысты. Қатысушылар бейнеролик дайындау, көркемсөз оқу және ақын өлеңіне жазылған әндерді орындаудан бақ сынады. Қазылар алқасы үміткерлерді бағалау кезінде олардың мәнерлеп оқу шеберлігіне, дикциясына, әртістік қабілетіне, тіл тазалығына, кітап таңдау талғамына, ұсынылған бейнероликтің сапасына назар аударды. Қызықты да тартысты өткен шарада бас жүлдені Көктөбе ауылынан келген Арслан Жұман иеленді. І орынды Теріс ауылынан Қанатбек Бауыржан мен Талапты ауылынан Бердібай Бекзат еншіледі. ІІ орынды Қарасаз ауылынан Тұрсынбек Нұрислам және Бақалы ауылынан Жанысбек Айбек алса, ІІІ орынды қарабастаулық Мұхамбетжан Аяжан, Бәйтерек ауылынан Әбдіразақ Арайлым және Әлинұр Әнуарбекұлы олжалады.
Бұдан бөлек, аталған жоба аясында ересектер мен жасөспірімдер арасында аудандық спорт турнирі де өтті. Жасөспірімдер арасында тартысты өткен ойын нәтижесі бойынша І орынды Айдын Сайлау мен Әлібек Серікбай, ІІ орынды Ерасыл Базарбек пен Жансерік Бейсен, ІІІ орынды Ақназар Сейдахмет пен Елнұр Мейірхан қанжығасына байлады. Ал ересектер арасындағы ойында І орын Болат Жаңабаев пен Рүстембек Даниярға, ІІ орын Қанат Орманов пен Жеңісбек Өмірзақовқа, ІІІ орын Мұхамеджан Оразбаев пен Дархан Бейсалиевке бұйырды.
Сондай-ақ Б.Момышұлы ауылында орналасқан «Құлантау» бильярд клубында қоғам қайраткері, жазушы Шерхан Мұртазаның 90 жылдығына орай ересектер мен ардагерлер арасында аудандық турнир ұйымдастырылды. Шараны аудандық партия филиалының атқарушы хатшысы Марат Нарымбеков, аудандық мәслихат депутаты Зиядхан Бүрлібаев және Спорттық іс-шаралар өткізу орталығының директоры Жандос Баетов ашып, спортшыларға сәттілік тіледі. 18 азаматтың арасында өткен ойын бильярд бәсекесінде Руслан Сайлаубаев, Абай Баетов және Сәкен Батыршаев топ жарды.
