Ұлттық қауіпсіздік комитеті ведомствоның бұрынғы басшысы Кәрім Мәсімовке, сондай-ақ оның бұрынғы орынбасарлары Әнуар Садықұлов пен Дәулет Ерғожинға қатысты қылмысты істі тергеп жатыр.
Күдіктілерді қамауда ұстау мерзімі 7 айға дейін ұзартылған. Кәрім Мәсімов пен Әнуар Садықұловқа – 2022 жылғы 6 тамызға дейін, Дәулет Ерғожинге – 2022 жылғы 13 тамызға дейін қамауда ұстауға шешім шықты.
Жедел тергеу тобы Мәсімов пен өзге тұлғаларға қатысты Қылмыстық кодекстің мына баптары бойынша қылмыстық істерді тергеп жатыр:
ҚР ҚК 175-бабы 1-бөлігі – "Мемлекетке опасыздық жасау";
ҚР ҚК 179-бабы 3-бөлігі – "Билікті күшпен басып алуға бағытталған әс-әрекеттер";
ҚР ҚК 218-бабы 3-бөлігі – "Қылмыстық жолмен алынған ақшаны заңдастыру";
ҚР ҚК 362-бабы 4-бөлігі – "Қызметтік өкілеттігін асыра пайдалану";
ҚР ҚК 366-бабы 4-бөлігі – "Аса ірі көлемде пара алу".
8 қаңтарда ҰҚК ведомствоның бұрынғы төрағасы Кәрім Мәсімовтің ұсталғанын хабарлады. Оның қылмыстық ісіне "аса құпия" белгісі берілді.
