Бұл туралы сарапшы, саясаттанушы Марат Шибұтов мәлімдеді. Оның пайымдауынша, мектеп формасы аса қажет емес. Өйткені, ол оқушылардың арасындағы әлеуметтік теңсіздік мәселесін түбегейлі шешпейді.
«Менің ойымша, мектеп формасы аса қажет емес. Бұл бар болғаны біздің жеңіл өнеркәсібімізді бос ұстаудың бір жолы ғана. Мектеп формасын міндетті түрде кию балалар арасындағы әлеуметтік теңсіздік мәселесін шешпейді. Шындығында, сала басшылығы мектеп формасы әлеуметтік теңдікті қамтамасыз етеді десе, мүлдем дұрыс емес.
Кешіріңіз, бүгінде балаларда киім-кешектен басқа, кімнің табысы бар екенін білуге мүмкіндік бар. Мұны көптеген басқа жолдардан да көруге болады. Мысалы, баланы мектепке қандай көлікпен апарады, қайда тұрады, смартфонының қандай моделі бар немесе қалтасында қанша ақша бар... Мұның бәрін ешбір мектеп формасы түзете алмайды», – деді Марат Шибұтов.
