Ералы Тоғжанов Ақтөбе облысының әкімі болып тағайындалды
Ералы Тоғжанов Ақтөбе облысының әкімі болып тағайындалды
Мемлекет басшысының Жарлығымен Ералы Лұқпанұлы Тоғжанов Ақтөбе облысының әкімі болып тағайындалды. Бұл туралы Борт N1 Telegram арнасында жарияланды. Ералы Тоғжанов Ақтөбе облысының әкімі болып тағайындалып, ҚР Премьер-Министрінің орынбасары лауазымынан босатылды.
"Мемлекет басшысының Жарлығымен Ералы Лұқпанұлы Тоғжанов Ақтөбе облысының әкімі болып тағайындалды, ол Қазақстан Республикасы Премьер-Министрінің орынбасары лауазымынан босатылды", - делінген хабарламада.
Ералы Лұқпанұлы Тоғжанов 1963 жылғы 13 мамырда Батыс Қазақстан облысында дүниеге келген. 1988 жылы Қарағанды мемлекеттік университетін, 1994 жылы Қазақстан Республикасының Ғылым академиясының Мемлекет және құқық институтын тәмамдаған. Мамандығы бойынша біліктілігі – заңгер. Еңбек жолын 1980 жылы Орал облысы Октябрь орман шаруашылығының жұмысшысы ретінде бастаған. 1988-2001 жылдары – Қарағанды мемлекеттік университетінде оқытушы, ҚР Ғылым академиясының Мемлекет және құқық институтының директоры, факультет деканы, Қазақ мемлекеттік заң университеті филиалының директоры. 2001-2006 жылдары – Қарағанды облысы әкімінің орынбасары. 2006-2008 жылдары – Қазақстан Республикасы Әділет министрлігінің Дін істері жөніндегі комитет төрағасы. 2008-2017 жылдары – Қазақстан халқы Ассамблеясы төрағасының орынбасары, ҚР Президенті Әкімшілігінің Қазақстан халқы Ассамблеясы Хатшылығының меңгерушісі, ҚР Президенті Әкімшілігінің Ішкі саясат бөлімінің сектор меңгерушісі. 2017-2019 жылдары – Маңғыстау облысының әкімі. 2019-2020 жылдары – ҚР Кәсіподақтар федерациясының төрағасы. 2022 жылғы 11 қаңтарда ҚР Президентінің Жарлығымен Қазақстан Республикасы Премьер-Министрінің орынбасары болып қайта тағайындалды.