Қостанай облысындағы өртке байланысты 3 қылмыстық іс қозғалды

Қостанай облысындағы өртке байланысты 3 қылмыстық іс қозғалды

ҚР Бас прокуратурасы Қостанай облысындағы өртке байланысты 3 қылмыстық іс қозғады, - деп хабарлайды ведомствоның баспасөз қызметі. Қостанай облысының Әулиекөл, Ұзынкөл және Қарабалық аудандарында табиғи өртті сөндіру жалғасуда. Төрт елді мекенде (Аманқарағай ауылы, Озерное, Калинин және Лесное) алдын ала мәліметтер бойынша, 108-ге жуық тұрғын үй мен ғимарат зардап шекті. Келтірілген залал мөлшері анықталуда.

"Бүгінде Аманқарағай ауылының тұрғыны - 1936 жылы туған М.Бабенконың қаза тапқаны белгілі. Сонымен қатар 3 қыркүйекте Қостанай қаласында «Оружейная палата» аңшылық дүкені өртенген. Соның салдарынан дүкеннің жеті қызметкері зардап шегіп, үшеуі күйік шалып ауруханаға жатқызылды, ал төртеуі қаза тапты», - делінген Бас прокуратураның баспасөз қызметі таратқан хабарламада.

Аталған фактілер бойынша Қылмыстық кодекстің 204-бабы 2-бөлігі (отпен абайсыз жұмыс iстеу арқылы ауыр зардаптарға әкеп соққан немесе аса ірі залал келтірілген іс-әрекет), 341-бабы 1-бөлігі (ормандарды жою), 292-бабы 3-бөлігі (абайсызда екі немесе одан да көп адамның өліміне әкеп соққан өрт қауіпсіздігі талаптарын бұзу) бойынша сотқа дейінгі тергеп-тексеру әрекеттері басталды.

«Адамдардың қаза болғанын, зардап шеккендердің санын және өрт салдарынан келтірілген шығынды ескере отырып, қылмыстық істер Бас прокуратураның және Қостанай облысы прокуратурасының арнайы прокурорлары басшылық ететін тәжірибелі құқық қорғау және арнаулы органдар қызметкерлерінен құрылған тергеу-жедел топтардың іс жүргізуіне қабылданды. Тергеу барысы Бас прокурордың жеке бақылауына алынды», - деп хабарлады Бас прокуратурадан.

Aikyn.kz | Бүгінгі жаңалықтар. Әлем және Қазақстан жаңалықтары.