Шымкент қаласы Абай аудандық сотында Түркістан облысының 20 жасар тұрғынына қатысты сот үкімі шықты. Күдікті Telegram желісіндегі парақшалардың біріне «курьер» ретінде жұмысқа тұрып, интернет-ботпен хат жазысқан. Ол заңмен тыйым салынған заттарды иемденіп, оны өзімен сақтап, тасымалдап, Шымкент қаласы аумағындағы жасырын орындарға қалдырып жүрген.
Қолға түскен сәтінде күдіктіден жалпы 36 дана қара түсті изолентаға оралған есірткі заттары тәркіленген. Сонымен қатар ол жасырын орындарға тығып үлгерген жерлерден тағы 2 дана қара түсті изолентаға оралған есірткі заттары алынған.
«Сараптама қорытындысына сәйкес, тәркіленген есірткі заты синтетикалық психотпропты мемкатинонның аналогі – мефедрон екені анықталып, жалпы салмағы 39,831 грамды құрады.
Сотталушы өзіне тағылған айыпты толығымен мойындап, өкінетінін жеткізді. Сотталушының қылмыстық жауаптылығы мен жазасын жеңілдететін мән-жайларын, жасаған қылмысының қоғамдық қауіптілігінің сипаты мен дәрежесін, оның жеке басының деректерін ескере келе, сот күдіктіге «бас бостандығынан айыру» түріндегі жазаны қолдану қажет деп санап, оны уақытша қоғамнан оқшаулауға шешім қабылдады», – делінген Шымкент қаласы Полиция департаментінің баспасөз қызметі таратқан хабарламада.
