Түркістан облысы Кентау қаласында балабақшада ер адам тәрбиеші болып жұмыс істейді, – деп хабарлайды Aikyn.kz. «Хабар 24» телеарнасының мәліметінше, тәрбиеші Құралбек Исабекке балалармен жұмыс істеген ұнайды. Ол осыдан 6 жыл бұрын балабақшада педагогикалық іс-тәжірибеден өткен. Оның тәрбиеші болғанына бастапқыда ата-аналар таңғалған.
Ата-ана Гүлзат Сейтжанқызы: «Әуел баста «ер адам да тәрбиеші болады екен-ау» деп таңғалдым. Балаларды қарай ала ма деп күмәнданғаным да рас. Құралбек өз ісін жетік біледі. Балаларды жақсы оқытады. Қызық ойындар ойнатады. Ата-аналар ризамыз», – дейді.
Құралбектің пікірінше, қоғамда тәрбиеші «тек қана әйелдердің мамандығы» деген пікір қалыптасқан. Балаларға ер адамның да тәрбиесі қажет деп санайды.
«Ата-анам үнемі қолдайды. Мектепте емес, неге балабақшада жұмыс істейсің деп сұрайтындар да бар. Жұмысымды жақсы көремін. Кішкентай балалар күйбең тіршіліктегі барлық қиындықты ұмыттырып жібереді», – дейді Құралбек Исабек.
Балабақша меңгерушісі Әйгерім Қалдыбаеваның айтуынша, Құралбек Исабек жақсы тәрбиеші ғана емес, оның ұйымдастырушылық қабілеті де ерекше. Әріптестері, ата-аналар барлығы дән риза.
https://youtu.be/k971SDprRx8
