Теміртаулық әйел асырап алған баласын жылдар бойы гаражда қамап ұстаған. Адам көрмегендіктен, кәмелетке толмаған ұл баланың дамуы тежелген. Қазір әйелге қатысты екі бірдей қылмыстық іс тергеліп жатыр. Бұл туралы Қарағанды облысы Полиция департаменті хабарлады.
Баланы кездейсоқ біреулер байқап қалып, полицияға хабарлаған. Соның арқасында ғана ол гараждағы қапастан құтқарылыпты. Куәгердің айтуынша, жасөспірім сөйлемейді, жаза алмайды және оқи алмайды, дамуы артта қалған.
Жас бала патронаттық тәрбиеде болған, мектепке бармайды. Тіпті, оның құжаттары болмауы да мүмкін.
Полиция департаментінің хабарлауынша, жеткіншектің қанша жыл қамауда отырғаны, әйелдің қай кезде асырап алғаны белгісіз. Ресми емес деректерге сүйенсек, ол әйелдің сіңлісінің ұлы болуы мүмкін. Бірақ туған ата-анасының қайда екені белгісіз.
Әйел оны қамап қойып, жәрдемақысын өзі алып отырған. Баланың жағдайын ешкім тексермеген. Бұған қатысты Білім басқармасы мен білім бөлімі, сондай-ақ қамқорлық бөлімдері қандай да бір ақпарат беруден бас тартты. Олар баланың заңды өкілдері табылмайынша, дерек бермейміз деп отыр.
Аталған дерек бойынша, ҚР ҚК-нің 126-бабы (“Заңсыз бас бостандығынан айыру”) және 141 (“Балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау”) баптарына сәйкес қылмыстық іс тіркелді. Оқиғаның барлық қатысушыларынан жауап алынды. Тиісті сараптамалар алынды. Қазір тергеу амалдары жүргізілуде, – дейді Қарағанды облысы ПД ресми өкілі Бақытжан Құдияров.
