Түркістан облысы Полиция департаментінің бастығы, полиция генерал-майоры Мұрат Қабденов «AMANAT» партиясы Түркістан өңірлік филиалының қоғамдық қабылдау бөлмесінде азаматтармен кездесті. Полиция генерал-майоры тұрғындармен еркін, әрі ашық байланыс орнату үшін, яғни қарапайым халыққа қандай да бір ыңғайсыздық туғызбау үшін қабылдауды қызмет формасынсыз өткізді.
Қоғамдық қабылдауға Полиция департаментіне қарасты бірқатар салалық бөлімдер қатысты. Олардың ішінде тергеу, кадр, криминалдық полиция және әкімшілік полиция басқармаларының басшылары бар.
Өңірдің бас полицейі 10 азаматтың арыз-өтінішін бетпе-бет жүздесе отырып тыңдаса, тікелей эфир арқылы онлайн режимде қойылған сұрақтарға да нақты жауап беріп, ұсыныс-пікірлерді назарға алды.
Мәселен, Қазығұрт ауданынан келген Б.Серікбаев есімді тұрғын Қақпақ бағытындағы облыстық маңызы бар жолға камера қойылса, мал ұрлығы азаятын еді деген ұсынысын жеткізді. Мұрат Талапұлы бұл жағдайдың назарда екенін, аталған бағытқа камера қою 2023 жылдың бюджетіне енгізілгенін хабарлады. Мұнан бөлек алаяқтық, кибершабуыл, жол көлік апаттары, сергек бейнебақылауын іске қосу және өзге де шағымдарға түсіндірмелер, кеңестер беріліп, айтылған күрделі мәселелер бас полицейдің бақылауына алынды.
Шара соңында полиция генерал-майоры Мұрат Қабденов қабылдауға аяқсыз қалған арыздар мен жеке құрамдағы кейбір полицейлердің іс-әрекетіне қатысты сын-пікірлер айтқан біраз тұрғынның келгенін атап өтті. «Алайда келушілердің арасында полиция жұмысына алғыс айтқандар да баршылық. Осы ретте халықпен тікелей диалог құру және ашықтықты нығайту мақсатындағы жұмыстардың берері мол деген ойдамын. Біздің міндет – қылмыс пен құқық бұзушылықтарға жол бермеу, осы жолда шаршамай, халыққа мінсіз қызмет атқара береміз», – деді ол.
Атап өтейік, Партия филиалы келіп түскен арыз-өтініштер оңтайлы шешілгенге дейін полиция департаментімен бірлесіп, тиісті шараларды қабылдап отырады.
