Президент жүктеген міндеттерді орындауға дайын
Президент жүктеген міндеттерді орындауға дайын
367
оқылды
Сенат Спикері Мәулен Әшімбаевтың төрағалығымен «Өңір» депутаттық тобының жаңарған құраммен алғашқы отырысы өтті. Онда депутаттар Мемлекет басшысы Қасым-Жомарт Тоқаевтың VIII сайланған Парла­менттің бірінші сессиясында Парламент пен Үкіметке жүктеген міндеттерін талқылады. Отырысты ашқан Мәулен Әшімбаев ел Пре­зиденті белгілеп берген маңызды басымдықтар жаңар­ған Парламенттің жұмысындағы аса маңызды бағыттар екенін атап өтті.
«Президентіміздің тапсырмалары аясында Мәжілістегі әріптестерімізбен және Үкіметпен бірлесіп, жаңа формациядағы заңдар қабылдауымыз керек. Ол дегеніміз – ел дамуының жаңа кезеңінен жол ашатын, кешенді реформаларды қамтитын және бүгінгі сын-қатерлер ескерілген заңдар. Пала­та­ның күн тәртібінде Әділетті Қазақстан құруға ар­нал­ған заңдарды қабылдау міндеті де тұр. Олар­дың қатарында шетелге заңсыз шығарылған актив­терді қайтару жөніндегі заң және мемлекеттік сатып алу туралы жаңа заң бар», – деді Мәулен Әшімбаев.
Сонымен қатар Сенат Төрағасы Салық, Бюджет, Қала құрылысы және Су Кодекстерін қабылдау бойынша жұмысты сапалы ұйымдастырудың маңыз­ды екенін айтты. Мемлекет басшысы айқындаған басым бағыт­тардың бірі өңірлерді дамыту. Бұл Сенат жұмысын­дағы маңызды басымдықтардың бірі және «Өңір» депутаттық тобы атқаратын қызметтің негізі екені белгілі. Соған байланысты Палата Спикері депутат­тық топ жұмысының басты бағыттарын атап көр­сетті. Нақты айтқанда, «Өңір» тобына мүше сена­тор­лар өңірлерге жүйелі түрде шығып, жергілікті халықпен, оның ішінде ауыл тұрғындарымен кез­десіп, аймақтағы көпшілікті алаңдатқан проблема­ларды анықтап, олардың оң шешілуіне ықпал етуі керек. Сенат Төрағасы ол үшін дәстүрлі тетіктермен бірге жаңа тәсілдерді де қолдану қажет екенін, сарапшыларды, жұртшылықты және БАҚ өкілдерін жұмылдыра отырып жұмыс істеу керектігін айтты.