Қарағанды қаласында Жайық Бектұров атындағы облыстық жасөспірімдер кітапханасында айтыскер ақын, қоғам қайраткері халқымыздың арасында «Сары тентек» атымен белгілі Мақсұтов Қуаныш Мәжкенұлының өмірінің айтулы белесі – 60 жасқа толу мерейтойына арналған «Қазақтың жоғын жоқтадым...» кездесу кеші өтті.
Кеште жастар ақынның өлеңдерін оқып, құттықтап келген қонақтар ізгі-ниеттерін білдірді.
Ақын өз өлендерін оқып, бард әндерін орындады.
Қуаныш Мәжкенұлы Мақсұтов – 1963 жылы 23 ақпанда Қарағанды облысы Ақтоғай ауданында туған. 1979 жылы осы аудандағы Қаратал орта мектебін, 1988 жылы ҚарМУ-ның филология факультетін бітірген.
Халықаралық, республикалық ақындар айтыстарының, республикалық «Жігер» фестивалінің (1985), Университеттердің Бүкілодақтық фестивальдерінің лауреаты (1984,1985). «Қазақстан» телеарнасында тікелей эфирде өткен республикалық «Аламан айтыс» жарысында «Орақ тілді, от ауызды Ақын» атағы берілген (2006-2008).
Ақындар айтыстарындағы батыл да шыншыл қоғамдық-саяси ойлары үшін халқымыз «Сары тентек» деп атайды.
Бірнеше интеллектуалдық жобалардың авторы. «Замандас-Современник» газетінің негізінде жасаған «Қазақстанның ақпараттық индустриясы» деген жобасын Қазақстан Республикасыны Президенті жоғары бағалаған.
Жастардың рухани, мәдени, саяси белсенділігін арттыруға арналған «Балауса» әдеби-шығармашылық бірлестігі» атты жобасы республикалық, одақтық шараларымен танымал болған.
Біріккен Ұлттар Ұйымы мен ЮНЕСКО-ның бағдарламалары аясында өз жобаларын жүзеге асырған.
«Мәңгілік мұңның әуені» атты бард әндер жинағы (2013), «Тәкаппар мұңның кербез тамшылары» атты жыр жинағы (2013) жарық көрген. «Астана қаласының 10 жылдығы» мерекелік медалімен марапатталған.
Қарағанды облыстық телевизиясында аға редактор, Қарағанды облыстық «Қазақ тілі» қоғамы төрағасының бірінші орынбасары, Жезқазған облыстық Жастар ісі жөніндегі комитетінің төрағасы, Сәтбаев қаласы әкімінің орынбасары, «Қазтұтынуодағы» Жезқазған облыстық басқармасы жетекші маманы, Қарағанды облыстық «Замандас-Современник» газетінің бас редакторы, «Сайгез» қорының президенті, «Маздау» қоғамдық қорының директоры қызметтерін атқарған. Қазіргі уақытта Қарағанды облысының ішкі саясат басқармасының «Қоғамдық келісім» КММ-де қызмет істейді.
Әдебиет Белгібайұлы