Сонымен қатар ол төрт тілді еркін меңгерген полиглот қана емес, білім саласымен айналысып жүрген кәсіпкер. Жырақта жүрген қандасымызбен спорттағы жоспары мен қазіргі өмірі туралы сұхбат құрған едік.
– Гүлжан, алдымен спортқа қалай келгеніңді біле отырсақ...
– Мен Қызылорда қаласында өмірге келдім. Балалық шағым өте бақытты, қызықты өтті. Әкем мен анам сабағыма, жақсы білім алуыма қатты көңіл бөлді. Зерек болғасын шығар, фортепиано, би және спортпен кішкентайымнан айналыстым. Бойымдағы энергиям тасып жүретін мені ата-анам спортқа 6 жасымнан берді. Өзім бәсекелестікті өте ұнатамын. Сондықтан болар осындай жекпе-жек спорт түрлері маған өте жақын. 2017 жылдан бастап джиу-джитсу бойынша ҚР Ұлттық құрамасының құрамында Қазақстанды әлемдік аренада көрсете бастадым. Құдайға шүкір, екі рет әлем чемпионы болдым.
– Жастайыңыздан білімге құштар болған екенсіз. Қандай мамандық бойынша білім алдыңыз?
– Мектепті бітірісімен Алматыдағы Қазақ-Америка университетінің «Халықаралық қатынастар» мамандығына оқуға түстім. Оқи жүріп «Sony» корпорациясында жұмыс істедім. Кішкентайымнан теледидардан Испанияның фильмдерін көруді ұнаттым. Әрі сонда тұрамын деп алдыма мақсат қойдым. Осы оймен Барселонаға оқуға аттандым. Онда бизнес және туризм саласындағы магистр дәрежесін алдым. Ол елде университетпен әріптестік орнататын агенттік тауып, испан тілін меңгере бастадым.
– Неліктен Испанияны таңдадыңыз? Еуропаның өзге де мемлекеттері бар емес пе?
– Мұнда алғашқы жылдары кереметтей сезімде жүрдім. Бұл елге келуіме Алматыдағы қарбалас тірлік себеп болған шығар. Алматыда сабақтан соң жұмысқа барып, жұмыстан соң құрбымыз екеуіміз өзіміз ашқан «Хозяюшки» дүкеніне соғамыз. Әрине, онда да өмір қайнап жататын. Бірақ күн сайын қайталана беретін бірсарынды тірліктен шаршағанымды сездім. Ақыры, дүкенді құрбыма тапсырып, өзім оқу аяқтаған соң Испанияға аттандым. Мыңнан бірдің ғана қолы жететін Sony корпорациясымен де келісімшартты үздім. Менің бұл қылығыма қарап бас шайқағандар көп болды. Бірақ мен арманымды алдағым келмеді. Испанияның маған өмір салты ұнайды. Мұнда Барселонада менің 15 туысым бар. Олар – Қызылорда, Алматы, Астана, Семей, Өскемен және Павлодардың қазақтары.
– Ал жеке кәсібіңізді қалай бастадыңыз?
– Барселонада алғашқы жылы-ақ туризмді дамыту мәселелерімен айналысатын компанияда тәжірибеден өттім. Маған ол жұмыс өте ұнады. Мен жұмыс істеген топ Хорватия туризмін зерттейтін. Штаттағы қызметкер орындайтын барлық техникалық жұмысты бітіріп бердім. Тұрақты жұмысқа қабылдануыма толық мүмкіндік берді. Бірақ менің көздегенім өз жеке ісімді ашу болатын. Көп ұзамай, бизнес жоспар құрып, бар күшімді соны іске асыруға жұмсадым. Мен онда өзге елден Еуропа мен Канадаға оқуға түсушілермен жұмыс істедім. Бастапқыда әлеуметтік желі арқылы клиенттеріммен онлайн кездесулер өткізіп жүрдім. Осылайша, Education Best атты компаниям уақыт өте келе таныла бастады. Оған сұраныс та арта бастайды. Бұл компания шетелде оқуды ғана емес, сонымен қатар халықаралық іс-тәжірибеден өтуге де көмектеседі.
– Алдағы уақытта қандай жоспарларыңыз бар?
– Қазір екі кішкентай балам бар. Босанғаннан кейінгі қалпыма келген соң, джиу-джитсуға қайтып ораламын деп жоспарлап отырмын. Study Prof компаниямды әрмен қарай дамытуым керек. Сонымен қатар балаларымды да спортқа бейім қылып өсірсем деп отырмын. Сондай-ақ үшінші рет әлем чемпионы болғым келеді.
Сұхбаттасқан
Наурызбек САРША