Астаналық жас жұбайлар ойын-сауық орындарында есірткі таратқан, – деп хабарлайды Aikyn.kz Polisia.kz-ке сілтеме жасап.
«Қарасора – 2023» жедел-профилактикалық іс-шарасы аясында елордалық полицейлер ойын-сауық орындарына есірткі жеткізумен айналысқан жас жұбайларды анықтады.
Астана тұрғынына тиесілі Mercedes-Benz автокөлігін тінту барысында салмағы 200 грамнан асатын мефедрон есірткі заты салынған қағаз қапшық, орауыш ыдыстар мен есірткі заттарын қаптауға арналған құрылғылар тәркіленген.
Одан әрі ерлі-зайыптылардың Бектұров көшесіндегі тұрғылықты жерін тінту кезінде ас үй шкафынан салмағы 350 грамнан астам мефедрон есірткі заты бар сөмке табылған. Тәркіленген синтетикалық мефедрон есірткінің жалпы салмағы 558 грамм немесе шамамен екі мыңнан астам бір реттік дозаны құрайтын болған.
Қазіргі уақытта сотқа дейінгі тергеу амалдары жүргізіліп жатыр. Есірткі сатушылардың бірі Астана қаласы полиция департаментінің уақытша ұстау изоляторына қамалды. Елордалық полицейлер жыл басынан 750 есірткі қылмысын анықтап, салмағы 262 келі болатын есірткі тәркілеген, оның ішінде 43 келі «синтетика» болған.