Айталық, былтыр агроөнеркәсіптік кешен субъектілерін қолдауға 30,3 млрд теңге бөлінсе, биыл қолдау көлемі 30 пайызға артты, яғни 40 млрд теңге бөлінді. Бұл туралы брифингте облыстық ауыл шаруашылығы басқарма басшысының міндетін атқарушы Әлібек Әбдіхалықұлы мәлімдеді.
Әлібек Әбдіхалықұлы журналистер алдында жалпы өңірдегі ауыл шаруашылық саласындағы атқарылып жатқан жұмыстарды кеңінен атап өтті. Субсидия – тыңайтқыштарға, жылыжайды жылыту жүйесіне, дақыл өндірісіне, агроқұрылым жұмысын жандандыруға берілетінін айта келе Әлібек Әбдіхалықұлы облыстың аграрлық секторында 74 мың агроқұрылым жұмыс істейтінін жеткізді.
– Жалпы, нарықты азық-түлік өнімдерімен толықтыру, өнімдердің бәсекеге қабілеттілігін арттыру мақсатында 2021-2025 жылға дейінгі кезеңде агроөнеркәсіп кешені саласында жалпы құны 237,5 млрд теңгені құрайтын 97 инвестициялық жобаны іске асыру көзделген. Осы орайда 2021-2022 жылдары 48,4 млрд теңгеге 70 жоба іске асырылды. Ал биылғы 8 айда аталған салада құны 10,6 млрд теңгеге 26 жоба жүзеге асырылды, – деді спикер.
Бұдан өзге, облыста қарқынды бау шаруашылығы дамып келеді. Қазір оның көлемі 5 мың гектарды құрайды. Ал су үнемдеу технологияларын пайдаланатын алқап 30,2 мың гектарға жетті. Технология ағын суды үнемдеумен қатар өнімділікті 2-3 есеге ұлғайтуға мүмкіндік беріп отыр.
Тельман БЕЙСЕН,
Түркістан облысы