«Біздің жұмысымыздың ерекшелігі сол, өрт сөндіру, құтқару жұмыстарында физикалық мықтылық пен арнайы дайындық өте қажет. Сол себепті спортқа арнайы уақыт бөлемін», – дейді Ерсейіт Бралин.
Бастапқыда әуесқойлық қызығушылықпен спортқа келген Ерсейіт мектеп ішіндегі, кейін ауыл ішіндегі түрлі спорттық шараға қатыса бастаған. «Наурыз тойы, Жеңіс күні, Ораза айт, Құрбан айт сияқты түрлі мерекелерде біздің ауылымызда міндетті түрде бұқаралық шаралар болады. Сол шараларда қазақша күрес, кір тасын көтеру, қой көтеру сияқты жарыстарға қатысатынмын. Сөйтіп, бірнеше рет жеңімпаз атанып жүрдім. Спортпен кәсіби тұрғыда айналысамын деген ниет осындай кішігірім жеңістерден туындады», – дейді Ерсейіт.
Жақында Ерсейіт Маңғыстау облысында өткен «Толағай» атты алыптар сайысына қатысып келді. Ол бір минут ішінде қашықтыққа салмағы 141 келі табиғи тасты көтеріп жүру, ұзындығы кемінде 80 см және 150 см аспайтын, диаметрі 14-16 мм-ден кем емес арматураны мойынға қойып ию, ұзындығы 2-3 метр, салмағы 500 келі арбаны сүйреу, ұзындығы 150 см аспайтын, салмағы 10 келі ұшы темір, табиғи ағаштардан жасалған найзаны қашықтыққа лақтыру бойынша сынға түсті. Атыраулық алыптың мықтылығы мен ептілігіне көрермендер де тәнті болған. Осылайша, Ерсейіт Бралин жеңімпаз атанып, желтоқсан айында өтетін республикалық алыптар сайысына жолдама алды.
«Толағай» сайысы – батырларымыздың жүріп өткен жолын дәріптейтін, қазақтың этноойындарын жаңғыртатын ерекше жоба. Қазақ халқы қашанда темірден түйін түйіп, тау көтерген батырларымызбен ерекшеленген. «Толағай» – Балуан Шолақ, Қажымұқан аталарымыздың ізін жалғаушы батырларымызды танытатын ерекше жоба. Сондықтан мұндай алыптар сайысына қатысып, өнер көрсету мен үшін үлкен мәртебе болды», – дейді Ерсейіт Бралин.
Ерсейіт аптасына үш мәрте үш сағатын жаттығуға арнайды екен. «Тренерім Александр Литвиновке алғыс айтамын. Ол кісі спортшыны жеңіске жетелейтін мінез екенін үйретті. Спортшы үшін жеңіске деген ұмтылыстың болуы аз. Спортшыда өзіне тән мінез, жігер болуы қажет», – дейді Ерсейіт.
Ерсейіт есімі әлемге жайылған Қажымұқан Мұңайтпасовты өзіне үлгі тұтады.
Баян ЖАНҰЗАҚОВА