Отырысқа Қазақстан Қарулы күштерінің бас штабы ұйымдастыру-жұмылдыру жұмыстары департаменті бастығының орынбасары Руслан Омаров қатысты.
Жиынды ашқан облыс әкімінің орынбасары Бақытжан Хаберұлы өз сөзінде жастардың бойында отаншылдық рухты көтеріп алмай әскерге шақыру, әскери міндет туралы құр айту жөнсіз екенін атап өтті.
«Жастардың бойына патриоттық сезімді дарыту керек. Ол үшін облыстық деңгейде мақсатты жұмыстар жүргізілсін. Аудан әкімдері өз деңгейлеріңізде балабақшалардан бастап, отаншылдық рухтағы тәрбие мәселесіне көңіл бөліңіздер. Жастар ел алдындағы, Отан алдындағы борышын өтеуге ерікті түрде, мақтанышпен баратындай деңгейге жету керекпіз», – деді аймақ басшысының орынбасары Бақытжан Нарымбетов.
Ал Қазақстан Қарулы Күштерінің Бас штабы ұйымдастыру-жұмылдыру жұмыстары департаменті бастығының орынбасары Руслан Омаров болса, әскери қызметте жемқорлыққа жол бермеу мәселесі өте өзекті екендігіне тоқталды. Ол өз сөзінде жемқорлықтың алдын алу үшін қазір цифрлық жүйеге біртіндеп көшіп жатқанын атап өтті.
«Жастардың бойына әскери-патриоттық тәрбие беру – бүгінгі күннің басты талабы болып отыр. Бұл жұмысқа барлық мемлекеттік органдар жұмылдырылуы тиіс. Сонда ғана біз патриот жастарды өсіре аламыз. Бүгінгі таңда әскерге баратын жастарды ҰБТ-дан босату, әскери кафедраға оқуға қабылдау мәселелері шешілді. Әскери саланы цифрландыру мәселесіне қатысты да жұмыстар жүргізіліп жатыр. Біз бүгінде барлық мемлекеттік органдардың базаларынан 18-60 жасқа дейінгі ер азаматтарға қатысты ақпараттарды біріздендіру жұмыстарын жүргізіп жатырмыз. Бұл бізге өзімізге қажетті ақпаратты тез табуға мүмкіндік береді. Әскери саланы цифрландыру жұмыстары алда да жүре береді», – деді Қазақстан Қарулы Күштерінің Бас штабы ұйымдастыру-жұмылдыру жұмыстары департаменті бастығының орынбасары Руслан Омаров.
Жиында бұдан бөлек, әскери саладағы жемқорлықтың алдын алу мәселесі талқыланды. Аймақ басшысының орынбасары Бақытжан Нарымбетов «Жемқорлыққа жол бермеу үшін адами факторды азайту керек. Өкінішке қарай, бізде қорғаныс саласында әлі барлық құжат адам қолымен толтырылады, анықтамалардың бәрі адам қолымен беріледі. Біз осыны азайтып, толық цифрлық жүйеге көшуіміз керек», – деді.
БҚО Қорғаныс істері жөніндегі департамент бастығының орынбасары Альберт Бекмұхановтың айтуынша, биыл күзде облыс бойынша 600-дей адам әскер қатарына шақырылады деп жоспарланған.
Жанат ҚАЙЫРҒОЖИНА,
Батыс Қазақстан облысы