Олардың жаңа технология, ағылшын тілі, құқықтық білім сияқты бірқатар сала бойынша дағды-машықтарын шыңдап, білім көкжиегін кеңейту үшін Л. Гумилев атындағы Еуразия ұлттық университеті жанындағы Үздіксіз білім беру институты биыл екінші жыл қатарынан «Күміс университет» жобасын жүзеге асырып келеді.
«Күміс университет» жобасы аясында егде жастағы кісілер 5 бағдарлама бойынша білім алады: қарым-қатынас пен саяхатқа арналған тілдік курстар, құқық, тарих, мәдениеттану және өнертану, сауықтыру бағдарламасы. Аталған университет былтыр 35 бағытта курс ұйымдастырса, биыл 18 бағыт бойынша курстарға өтінім қабылдауда. Бүгінге дейін мұнда 2 000-нан астам аға буын өкілі әртүрлі бағыттағы курстарға қатысу мүмкіндігін иеленіп, тиісті сертификаттарын қолға алған.
Курстарға қатысуға ниет білдіргендердің басым бөлігі ағылшын тіліне, цифрлы сауаттылыққа қызығушылық танытады екен. «Күміс университеттің» биылғы түлектерінің бірі – 80 жастағы Қайыпқали қария. Ақсақал немерелерінің оқып жүрген ағылшын тіліне қызығып, бір жағынан үлгі болсын деген ниетпен курс сабақтарына жазылып, биыл жақсы нәтижемен тәмамдаған.
Ағылшын тілі пәнінен қарияларға дәріс өтетін мұғалім Айнаш Әлжанованың айтуынша, егде тартқан жандарға сабақ өту жастарға үйреткенге қарағанда киынырақ. Сөздің жазылуы мен айтылуында айырмашылық болуы оларға қиындық туғызады, сондықтан студенттер кейде бір тақырыпты бірнеше рет қайталап өтеді.
«Қазір студенттерге ағылшын әліппесінен бастап, әртүрлі тақырыптағы диалогтерді үйретіп жатырмыз. Мысалы, ойын-сауық орындарында, мейрамханаларда, әуежай мен теміржол вокзалы кассаларында болатын диалогтерді жаттатып жатырмыз», – деді ол.
Ақпараттың қарыштап дамыған заманында цифрлы сауаттылық пен медиасауаттылықты үйренуге ықылас білдіргендер саны біршама екен. Цифрлық сауаттылық курсы зейнеткерлерге смартфонды, соның ішінде банктік қосымшаларды пайдалануды, электронды үкімет қызметтеріне өтініш беруді және басқа да пайдалы дүниелерді оңай пайдалануға мүмкіндік беруге бағытталған. Осы бағдарлама бойынша сабақ беретін педагогтер Әділет Серікқазы мен Жансая Тұрар білім алушыларға цифрлық сауаттылықты қолжетімді етуге және цифрлы қоғамда еркін өмір сүруге көмектесуге ниетті.
– Сабаққа 50 жастан асқан 40 студент қатысады. Аптасына бір рет келетіндіктен, көбі кей тақырыптарды ұмытып та қалады. Зейнет жасындағы адамдар үшін арнайы бір әдістеме жасалмаған, сондықтан әзірге оларға базалық деңгейдегі тақырыптар өтіп жүрміз. Әрқайсысы өз қызығушылықтарымен келгені көрініп тұр. Бірі немерелерімен бір толқында болу үшін келсе, енді бірі сабаққа жас кезде алған білімін қайта жаңғырту үшін қатысады. Қазір олар компьютерде мәтін теріп, сурет салуды үйреніп жүр. Әрқайсысының сұрақтарына жеке жауап береміз, кейде үлгермей жатсақ, ерікті студенттер де келіп көмектеседі, – дейді цифрлық сауаттылық курсының мұғалімі Әділет Серікқазы.
«Күміс университет» ашылғалы бері сабаққа тұрақты түрде қатысып жүрген үлгілі студенттердің бірі – 77 жастағы Гүлжаһан әжей.
«Былтыр осындай курстың ашылатынын естідім. Ағылшын тіліне тіркелуге үлгермей қалғандықтан, әуелі француз тілі курсына қатысқан едім, енді биыл ағылшын тілінен де, цифрлық сауаттылықтан да білімімді жетілдіріп жатырмын. Екі айдың ішінде курс жақсы нәтижелерін берді, үйде отырып-ақ құжаттарымды қарай алатын болдым, өзіме керекті ақпараттарды интернеттен оңай таба аламын. Қазір заман дамып жатыр, біз зейнеткер болсақ та, сол заман ағымынан тыс қалып қоймайық деп өзімізге арналған сабақтарға қатысып жатырмыз. Әрі немерелеріміз бар, оларға да үйрету керек», – дейді Гүлжаһан әжей.
«Күміс университет» бағдарламаларының ішіндегі тағы бір қызықты курстар – «Тоғызқұмалақ», «Белсенді ұзақ өмір сүру», «Экономикалық сауаттылық», «Қазақ халқының әдет-ғұрпы», «Дағдарыстық психология негіздері». Қысқасы, курсты бітіргендер шетелге шыққанда да тосылмайтын, смартфонның тілін шемішкеше шағатын, қаржылай сауатты, денсаулықты қалай күтуді де білетін, нағыз заманауи, танымы кең ата-әже болып шығады.
Сымбат БАУЫРЖАНҚЫЗЫ