600 оқушыға арналған тарихи мектепте төрт жылға жуық жөндеу жұмысы жүрді.күні кеше жаңа, жарық, заманауи білім ошағы оқушылар мен ұстаздар қауымы үшін есігін айқара ашты.
Ескі мектеп ғимараты 2017 жылғы 18 сәуірдегі «ЖайықСтройИнжиниринг» ЖШС-ның қорытындысы негізінде «апатты жағдайда» деп танылған болатын, мектеп оқушылары 2022-2023 оқу жылында 10 жерде, биыл 5 жерге бөлініп, әбден шашырап қалып еді. Бұл ата-аналар тарапынан наразылық туғызғаны жасырын емес. Енді, міне ауданда көптен күткен қуанышты сәт. Балалар мен ұстаздар өз ұясына оралып, мәре-сәре болуда.
Мектептің ашылу салтанатына Казталов ауданының әкімі Асланбек Сарқұлов, облыстық құрылыс басқармасының басшысы Әлібек Антазиев, облыстық білім басқармасы басшысының орынбасары Бисенбек Насимуллин, Алма Оразбаеваның туысы Ринат Оразбаев және ауыл тұрғындары қатысты.
Салтанатты шарада сөз алған Казталов ауданының әкімі Асланбек Сарқұлов: «Ұлт ұстазы Ахмет Байтұрсынұлының: «Білімді болуға оқу керек. Бай болуға кәсіп керек. Күшті болуға бірлік керек. Осы керектердің жолында жұмыс істеу керек» деп айтқан қанатты сөзін әрбіріміз есімізден шығармағанымыз абзал. Осы орайда «Жеті түрлі ілім білетін» ұрпақ тәрбиелеу – бүгінгі күннің негізгі міндеті. Биыл бірегей білім ордасының ашылғанына 155 жыл, қоғам қайраткері Алма Оразбаеваның туғанына 125 жыл толып отыр. Осындай айтулы даталармен тұспа-тұс келген мектептің жаңа ғимаратқа көшуі өңіріміз үшін елеулі оқиға», – деді.
Ұзақ жылдық тарихы бар мектептің ашылуына облыс әкімі Нариман Төреғалиевтің атынан құттықтау жолданып, жаңа мектепке ЛЭД экран табыс етілді. Мектептің ашылу рәсімі Бисенбек Жамбылұлы мен ардагер ұстаз Гүлжиян Гарифқызына, Алма Оразбаеваның туысы Ринат Иусупұлы мен мектеп мақтанышы, олимпиада жүлдегері, «Алтын белгіге» үміткер Әлихан Жаныбековке жолданып, лентасы қиылды.
Алма Оразбаева атындағы 600 балаға арналған мектеп заман талабына сай жабдықталған. Мектепте әр балаға арналған 600 шкаф, кейбір сыныптарда ЛЭД экран орнатылған. Мектеп іші жарық, жылы және кәріз желісі, ауа реттегіш вентиляциямен қамтылған. Жаңа ғимаратта 32 оқу кабинеті бар, 11 интерактивті тақта, 10 интерактивті панельмен жабдықталған. Сонымен қатар 1 шеберхана, 1 информатика кабинеті, 1 робототехника кабинеті, спортзал, 2 кітапхана және 50 орындық оқу залы, 130 орындық акт залы, 270 орындық асханасы, арт студия, Алма студия, фото студия, психологиялық тренинг кабинеті бар.
Оқушылардың сапалы білім алуына толық мүмкіндік жасалған. Заманауи мектепті аралап көрген қонақтар ризашылығын білдірді.
Ж.ҚАЙЫРҒОЖИНА