Бүгінде Шымкент қаласында бой көтеріп жатқан әлеуметтік нысандар құрылысы жоспарға сай атқарылуда. Атап айтқанда, білім саласында 2023 жылы 7 нысанның құрылысын жүргізіп, 6 нысанды пайдалануға тапсыру жоспарланған болатын. Қалған 1 нысанның (Тұран шағынауданындағы оқушылар сарайы) құрылысы 2024 жылға өтпелі.
Әлеуметтік нысандар – басты назарда
383
оқылды

10 айдың қорытындысы бойынша 5 нысан пайдалануға тапсырылды. Оның ішінде Нұр­­сат шағынауданындағы оқушы­­лар сарайы, № 8, 45, 65 мектеп­­­тер­­­ге қосымша ғимарат және Майлин көшесі №4 мекен­­жайын­да орналасқан өнер мек­­­тебі тұрғындар игілігіне бе­ріл­ді. Сайрам шағынауданы №10 кол­ледж­дің қосымша ғимаратының құрылысы жыл қо­рытындысымен пайдалануға тап­­сы­рылады. Бұдан бөлек, жыл ба­сы­нан бері 3 спорт нысаны пайдалануға тап­сы­­рыл­ды. Олар – металлург стадио­ны, Бозарық ша­ғынауданындағы ауыр ат­летика мек­тебі және Жел­тоқсан кө­ше­сіндегі №22 медкол­ледж спорт залы. №12 спорт мек­тебінің қосымша ғи­ма­рат құры­лысы 2024 жылға өтпелі.

Денсаулық сақтау саласында 1 ны­сан­ның (Қазыбек би көшесі, 36 ме­кен­жай­дағы стационар құрылысы) құры­лы­сын аяқтауға қаржы қаралып, меке­ме құры­­­лысы толық аяқталды. Мә­де­ниет саласындағы 1 нысанның – Шым­кент сити шағынауда­­­­нын­­дағы конг­ресс-холл құры­­­лысы биыл аяқталып, пай­­­дала­­­­нуға беріледі. 

Осы тұста айта кетейік, Шым­кент қаласының әкімі Ғабит Сыздықбеков жуырда жауапты­­лармен бірге қаладағы құрылысы жүріп жатқан бірқатар әлеу­мет­тік нысанды аралады. Қала бас­шы­сы Шымкен сити шағынауданында бой көтерген конгрес-холл ғимара­тын ара­­лап, ат­қарылған жұмыс­тармен та­нысты. Қазір мұнда құрылыс-монтаж жұ­мыстары аяқ­­талып, нысанның бас­қару жүйесіне мамандар оқы­тылуда. Заманауи талапқа сай жабдықталған ғимаратта халық­аралық конг­рестерді, форум­дарды, мәжіліс­терді, симпозиум­дарды, ресми іс-ша­раларды және пле­нарлық отырыстарды өткізуге барлық жағдай жасалып жатыр. 

Жобаға сәйкес, бірінші блок­та мә­дени іс-шараларға арналған кәсіби муль­­тимедиалық жабдық­тар орна­тыл­ған 2 066 орындық көрермен залы орналасқан. Сон­дай-ақ 190 орындық конференц-зал, 80 орындық салтанат залы, 40 орындық баспасөз залы, тех­ни­калық бөлмелер бар. Ал екінші блок­та қолөнершілер орталығы, шеберхана қарастырылған. Ғабит Сыздықбеков жауаптыларға озық үлгіде жабдықталған жаңа нысанның мүмкіндігін арттыруда бірқатар тапсырма берді. Кон­грес-холл өндірістік кестеге сәй­кес жыл соңына дейін пайда­лануға беріледі. 

Одан соң үшінші мегаполис бас­шысы «Шымкент цирк» жұ­мысымен танысты. Дәл қазір ре­пертуар қорында 22 бағдар­ла­масы бар циркке жылына 90-100 мың көрермен келеді екен. Штат­­­тағы 11 бөлімде 55 әртіс, 22 эстра­далық оркестр, 10 му­зыка және жарық­пен сүйемел­­­­деуші, өзге де техникалық қызметкерлер жұмыс істейді. Қа­ла әкі­мі сала басшыларына ғи­маратты күр­делі жөндеуден өткі­зуге кедергі бо­лып отырған 3,1 гектар жер телімін пай­­далану құқы­­ғына қатысты өзекті мәселе­­лерді тез арада шешу бойынша нақты тапсырмалар жүктеді. 

Күрделі жөндеу жұмыстары жүріп жатқан Ғ.Иляев көше­­сіндегі № 113/5 көп­қабатты тұр­ғын үйдің құрылысы да қала әкі­мінің назарында. Күрделі жөн­деу жұмыстары қыркүйек айында тұр­ғындар келісімімен қайтарым­ды қаржы негізінде басталған бола­тын. Қазір үйдің қасбетін то­лығымен жаңарту жұ­мыс­тары жүріп жатыр. Күрделі жөндеу жұмыстарының 90 пайызы орын­далған. Өндірістік кестеге сәйкес қараша айының соңында жөндеу жұмыстарын толығымен аяқтау жоспарланып отыр. Құрылыс ба­ры­сын қадағалаған қала әкімі Тұрғын үй, Сәулет, Қала құры­лысы және Жер қатынастары бас­­­қар­маларының басшыларына үйдің сыртқы келбетін жөндеу барысындағы кемшіліктерді рет­ке келтіру бойынша тапсыр­малар берді. Сондай-ақ балалар және спорт алаңшаларын салуға жер телімдерін қарастырып, иррига­циялық жүйелерді орнату­ды жүктеді.

Айта кетейік, үшінші мегапо­листе жыл соңына дейін 136,7 мың шаршы метр болатын 1 816 пәтерлі 36 тұрғын үйді пай­дала­­­нуға беру жоспарланған. Оның 30-кредиттік, алтауы арен­да­­лық тұрғын үй. Бүгінде 41,5 мың шаршы метр құрайтын 540 пәтерлі 10 тұрғын үй пайдала­­­нуға тапсырылған. 

Жалпы, 2023 жылы Шымкент қ­а­лалық Құрылыс басқармасы тарапынан кон­цепция аясында мемлекеттік бюд­жет есебінен 46,4 млрд теңгеге 330,4 мың шар­шы метрді құрайтын 4 306 пәтерлі 100 көпқабатты тұрғын үй­­дің құры­лы­сын жүргізу жоспар­­­лан­ған. Олардың 18-і – Тұран, 56-сы – Бо­зарық, 26-сы Ақ­жайық шағынауданында бой көтер­мек. Жоспарға сәйкес, 100 көпқабатты тұрғын үйдің 8-і арендалық бол­са, 92-сі кредиттік нысан. 

Мамандардың айтуынша, мем­лекет бюд­жеті есебінен құры­лысы жүріп жат­қан тұрғын үй­лерден бөлек, жыл соңы­на дейін 1 405 пәтерді нарықтан сатып алу жоспарланған. Бұл пәтерлердің 900-і жұмыс істейтін жастарға, ал 505-і халықтың әлеуметтік осал тобындағы азаматтарға беріледі. Бүгінде жұмыс істейтін жастарға 450 пәтер, халықтың әлеуметтік осал тобындағы азаматтарға 363 пәтер сатып алынған. 

Жоспарланған 100 тұрғын үйдің 36-сы жыл соңына дейін пай­далануға беріледі. Қазір 10 көп­­қабатты тұрғын үй­дің кілті табысталып, тұрғындар ор­на­­ласып үлгерген.

Назгүл НАЗАРБЕК,

Шымкент қаласы