Комикс жанры елімізде кенжелеп қалған жанр екені мәлім. Сондықтан да Ильяс Юсуфжанов секілді жас таланттардың аталған салада еңбектеніп, қазақ мемлекетіне қатысты тарихи деректерді жастарға мейлінше өтімді тәсілмен жеткізуі айрықша мәнге ие. Автордың айтуынша, бұл жанр тарихи оқиғаларды жеңіл есте сақтап, балалардың қызығушылығын оятуға септігін тигізеді.
– Біз комиксті толығымен ұлттық музейдің антропологиясына сәйкес құрастырдық. Көптеген тарихшымен, филологпен кеңестік. Бұл бастаманың қайдан шыққанын да айта кетейін. Мен мектеп бітірген кезде біраз қиналдым. ҰБТ-тапсырған кезде Қазақстан тарихынан қажетті балл жинай алмадым. Көп деректі есте сақтай алмадым. Содан кейін тарихи оқиғаларды оңай есте сақтау үшін жазуға сурет қосу туралы ой келді. Бұл жұмысты ары қарай жалғастыратын боламын, – деді автор И. Юсуфжанов.
Жас жазушы түрлі түсті суреттермен бейнеленген кейіпкерлер арқылы тарихи деректерден хабардар етуді көздепті. Комикстің алғашқы шығарылымы 80 беттен тұрады. Автор «100 отандық комикс» жобасы аясында қазақтың әр ханына арнап комикс шығаруды көздеп отыр. Комикс қазақ және орыс тілдерінде басылып шыққан. Кітапханаларға тегін таратылады.