Мәулен Әшімбаев OzgeEpic креатив хабына барды.
OzgeЕpic креатив хабының жұмысы бөлек

Онда палата Спикері «Ел-ана» көрмесінің жұмысымен және команданың бірқатар арт-перфор­ман­сымен танысты. Хаб қызметінің негізгі бағыты – ұлттық құндылықтарды дәріптеу және өнер саласындағы таланттардың қолдау.

Мәулен Әшімбаев қазіргідей технология заманында креативті индустрияның экономикалық мүмкіндігі мен келешегі зор екенін атап өтті. Сондықтан Мемлекет басшысы Қасым-Жомарт Тоқаевтың тапсырмасымен Қазақстанда осы саланы дамыту бағытында ауқымды шаралар іске асырылып жатыр.

«Президентіміз Қасым-Жомарт  Тоқаев өзінің Жолдауында креативті индустрияны және заманауи технологияны дамыту жөнінде нақты міндеттер жүктеді. Сондай-ақ Мемлекет басшысы ірі қалалармен бірге аудандарда да шығармашыл жастарды қолдауға арналған орталықтар ашу қажет екенін айтты. Соның аясында осындай хабтардың маңызы зор. Бұл жерде біз креативті алаңдардың жай-күйімен, жұмысымен және алдағы жоспарларымен таныса аламыз. Өздеріңізге белгілі, таяуда креативті сектор үшін салықтық жеңілдіктер қарастырылды. Осындай нақты шаралар елімізде бұл саланы дамытуға тың серпін береді деп сенеміз», – деді Мәулен Әшімбаев.

Сонымен қатар Сенат Төрағасы креативті индус­трияның жағдайы адами капиталдың сапасын көрсететін негізгі факторлардың бірі екенін айтты. Қазір креативті сектордың ел экономикасындағы үлесі 1 пайыздан аспайды. Осы көрсеткішті жақсарту үшін алдағы уақытта аталған индустрияны дамыту жолында жан-жақты, оның ішінде, заңнамалық бағытта да бірлескен әрі жүйелі жұмыс қажет.

«Бұл бағытты тиімді дамыту үшін салалық заң­наманы жетілдіру де аса маңызды. Осыған орай депутаттар тиісті жұмыстарды атқарып жатыр. Сондай-ақ қазір креативті индустрия білім беру үдерісінің де ажырамас бөлшегіне айналғанын көріп отырмыз», – деді Сенат Төрағасы.

Іс-шараға Мәдениет және ақпарат министрлігінің өкілдері, кинорежиссерлер, продюсерлер, театр актерлері, суретшілер және басқа да өнер қайраткерлері қатысты.