Мемлекеттік кеңесші, Ұлттық құрылтай төрағасының орынбасары Ерлан Қарин осы алаңда көтерілген бірқатар бастама нақты жүзеге асып жатқанын айтты. Шынында да Ұлттық құрылтай белсенді диалог алаңына айналып келе жатыр. Ұлытауда өткен алғашқы отырысында жалпы саны 40-тан астам бастама айтылса, былтыр Түркістанда өткен жиын барысында 120 осындай әртүрлі ұсыныс келіп түскен болатын. Ұлттық құрылтайдың форматы жай жиын өткізу емес, нақты мәселелер мен ұсыныстарды қызу талқылаудың, пікірталастың жұмыс алаңы ретінде қалыптасып келе жатқандығы қуантады. Бастысы айтылған ұтымды ұсыныс, өткір мәселе, өзекті тақырыптар сөз жүзінде қалмай, нақты іс, қабылданған шешімге айналып жатқанына жұртшылық куә.
Мәселен, Ұлттық құрылтайдың мінберінде синтетикалық есірткімен күрес жөнінде айтылып, былтыр 88 баптан тұратын кешенді жоспар қабылданды. Еліміздің шығыс өңіріндегі шекаралық аудандарда қайтадан қаншама жаңа аудан ашылып, инфрақұрылымдық жұмыстар жүргізіле бастады. Бұл да Ұлттық құрылтайдың мінберінде айтылған маңызды бастама. Ұлттық құрылтайда заң мен құқықтық тәртіп мәселесі үздіксіз көтеріліп жүр. Соның нақты нәтижесінде, қазір тұрмыстық зорлық-зомбылықпен күрес, балалар мен әйелдердің құқықтарын қорғау, есірткі саудасының жолын кесу және вейптерді сатуға тыйым салу туралы заң жобасы қолға алынды.
Барлық ұсыныс Ұлттық құрылтай хатшылығы тарапынан жинақталып, мемлекеттік органдармен бірлесе отырып, уақытылы пысықталып жатыр. Жұмыс кеңестерінде құзырлы министрлік басшылығы әр мәселе бойынша нақты статистиканы көрсетіп, есеп беру тәртібі қалыптаса бастады.
Түркістандағы Ұлттық құрылтайда Мемлекет басшысы Қасым-Жомарт Тоқаев еліміздің тағы бір айрықша белгі-сі – көшпелілер өркениетінің мұрасына тоқталды.
«Бұл біздің халқымыздың бүкіл әлемге танымал басты брендтерінің бірі. Менің бастамам бойынша V Дүниежүзілік көшпенділер ойындары 2024 жылы Қазақстанда өтеді. Бұл шара ұлттық спорт түрлерін дамытуға ықпал етеді. Біз бұл халықаралық жарыстарды жоғары деңгейде өткізуге тиіспіз», – деді Мемлекет басшысы.
Осылайша, Мемлекет басшысының бастамасымен биыл жазда V Дүниежүзілік көшпенділер ойыны Қазақстанда өтеді.
Жалпыұлттық құрылтайға еліміздің барлық өңірінен 117 қатысушы кіреді. Ұлттық Құрылтайдың маңызды міндеттерінің бірі – әлеуметтік консолидацияны одан әрі дамыту үшін идеялар мен қадамдарды әзірлеу. Арнайы «Құрылтай» мобильді қосымшасы жасалды. Ол елдің жаңғыруы туралы өз пікірін онлайн түрде білдіруге ықпал етеді, 9 онлайн-платформада («Құрылтай» мобильді қосымшасы) қазақстандықтар Ұлттық құрылтай хатшылығына өз ұсыныстарын жібере алады.
Парламент қабырғасында азаматтар мен мемлекеттің өзара іс-қимылының жаңа сапалық қағидаттарын қалыптастыратын «Қоғамдық бақылау туралы» заң жобасы қабылданды. Заң жобасы қоғам өкілдерімен (заңгерлер, құқық қорғаушылар, қоғам қайраткерлері) бірлесіп әзірленді. Заң жобасында қоғамдық бақылау нысандарының сан алуандығы, адам мен азаматтың конституциялық құқықтарын, бостандықтары мен заңды мүдделерін сақтау, жариялылық, қоғамдық бақылаудың заңдылығы сияқты бірқатар маңызды қағидат бекітілген.
Құрылтай жалпыұлттық диалогтің әмбебап моделіне айналды. Құрылтай құрамына депутаттар, ассамблея мүшелері, сарапшы мен құқық қорғаушы, барлық өңірдің, сондай-ақ азаматтық альянстың, қоғамдық кеңестердің, Үкіметтік емес ұйымдардың, бизнес-қауымдастықтардың және өндіріс саласының өкілдері кіреді. Ұлттық құрылтайдың жұмысы қоғамдық негізде атқарылатынын атап өту керек. Сонымен қатар Құрылтай мүшелерін ротациялау принципі қарастырылған. Бұл алдағы уақытта кезең-кезеңімен басқа да қоғам белсенділерін Ұлттық құрылтай жұмысына араласуға мүмкіндік береді.
Ұлттық құрылтайдың үшінші отырысы осы аптада ежелгі Сарайшық қаласының мекені – Атырау облысында өткелі отыр. Аталған диалог алаңы барлық қоғамдық кеңестің түйіні іспетті. Сонымен қатар Ұлттық құрылтайға Парламент депутаттары, саяси партиялардың, бизнестің ірі салалық бірлестіктерінің, медицина, білім, ғылым, мәдениет, спорт, адам құқықтарын қорғау және басқа да әлеуметтік топтардың өкілдері мүше болды. Сондай-ақ жастардың көшбасшылары мен белсенді жас азаматтар да шақырылды.
Бибігүл ЖЕКСЕНБАЙ,
Парламент Сенатының депутаты,
Ұлттық құрылтай төрағасының орынбасары